Duarte Afonso De Araujo: Importansia Kultura Timor Leste

Kultura nudar save importante ba ema nia moris nudar animal So’I Hanoin no sidadaun ne’ebe mak dignu ba estabilidade sosio-kultural iha ambiente ida. Iha ita nian Lei Inan RDTL mos firme ba valor Kultura iha nasaun foun ida ne'e temi iha artigu 59.5 hakerek katak:

""Ema hotu-hotu iha direitu atu goja kultura no kreatividade no obrigasaun hodi preserva, proteje no fo valor ba kultura sira ne’ebe fo hela ba ita".

Hanoin hirak ne’e orienta ita katak atu labele husik le’et deit ba ita nia valores importante sira atu ita bele garante no konserva lolos no mo-mos saida mak sai ona rejultadu ka legadu ida hosi jerasaun ida antesendente.

Tanba ne’e, ita iha kna’ar importante atu aprende lisan no kultura oin-oin no kreativu atu hakonu atividade hodi alarga no inova buat ne’ebe sai ona ita nia kusta no haluan tradisaun oin-oin maibe tuir dalan origin ho hanoin ida katak ita atu prezerva no proteje hodi fo folin nafatin kulturais ne’e hanesan riku soin ida ne’ebe bei-ala sira husik hela ba ita, originalidade legadu ne’ebe mak husik hela ita obrigasaun atu konserva, prezerva no iha biban atu promove diak liu tan iha nasaun foun ida ne’e.

Ohin loron iha Timor Leste mudansa social ne’ebe mak akontese ema hotu-hotu sente lolos iha komunidade nia le’et hodi muda pensamentu ema individu nian, maibe mudansa hirak ne’e normalmente akontese tanba fo hanoin ida ba ema sira katak nesesidade ida ne’ebe mak la iha limitasaun. Ita bele halo komparasaun ida ba kondisaun sira ne’ebe uluk ho tempu ida agora, fenomena ida ne’e akontese iha aspeitu vida moris hotu-hotu hanesan ezemplu konkreta mak ekipamentu sira no akomodasaun moris, lala’ok moris nian, moris iha sistema organizasaun ne’ebe organizadu, sistema konesimentu iha area ruma ne’ebe mak diferente no seluk tan.

Hosi aspeitu hirak ne’e ita konsiderra hanesan mudansa social ne’ebe prefere ba mudansa kultura, maibe iha asuntu balun ne’ebe mak konsidera iha mudansa no iha buat seluk sei kontribui nafatin hodi asegura tanba susar no sei labele separa hosi nia kultura ne’e rasik.