PAPÉL LIDERANSA LOKAL IHA DEZENVOLVIMENTU KOMUNITÁRIU

TESE : CAMILO

DEZENVOLVIMENTU KOMUNITARIU

 

KAPÍTULU I

PROBLEMATIZASAUN PESKIZA

1.1  Enkuadramentu Peskiza

Koalia konaba dezenvolvimentu ita bele hatene nu’udar prosesu ou esforsu ida atu hadi’a buat ne’ebé ladun diak ba diak liu, ou hamosu buat foun ba vida moris komunidade. Prosesu dezenvolvimentu ne’ebé  hatur durante ne’e, seidauk responde nesessidade komunidade nian, kondisaun akontese tamba fó deit benefisiu ba ema ka grupu balun deit.

“Kestaun refere akresenta husi Deputadu, Inacio Moreira hosi Komisaun G, bazeia ba fiskalizasaun ne’ebé sira halo dala balun Governante sira fó projetu ba sira nia familia no osan barak mak aloka ba projetu ne’e, maske sira rasik la direitamente jere kompañia ne’ebé sira iha, maibe fó ba sira nia maun-alin no sira nia maluk ou kolega grupu (grupu Polítiku) nian hodi jere. Sira tenke liu dalan ida ne’e hodi evita kontrolu husi Públiku no Sosiadade Sivil sira. (TimorNewsLine, 12 Outubru 2011)”[1].

           

Timor-Leste nu’udar Nasaun foun, hahú’u nia Polítika Administrativa Transitória iha Misaun Nações Unidas (UNTAET) nia okos durante tinan rua ho balun nia laran no ikus mai iha loron 20 fulan Maio tinan 2002, Timor-Leste hetan  soberania total liu husi Polítika Restaurasaun Independensia.

Governu Timor-Leste atráves husi lei númeru 2/2004 konaba eleisaun Suku, realiza eleisaun faseadas ba membros Konsellu Suku hamutuk 442 Sukus ne’ebé mak komesa iha Dezembro 2004 no finaliza iha Setembru 2005. Eleisaun Suku ida ne’e mak primeiru eleisaun lokal ne’ebé hala’o iha ita nia rai depois de eleisaun geral 2001 nomos 2002 ba assembleia konstituante nomos Presidente da República Respectivamente.

Wainhira Governu deseña lei no regulamentus básikus hodi estabelese Suku nomos nia orgaun sira, iha altura ne’eba Governu mos realiza hela estudus espesialijadus konaba divijaun administrativas iha País nian nomos diferentes modelus konaba deskonsentrasaun no desentralizasaun administrativa ne’ebé mak sei implementa iha Timor-Leste. Entretanto, sem prejuízo leis sira ne’ebé mak sei mosu mai husi rezultadu estudu espesialijadu, ida ne’e importante tebes atu governu iha tempo ida ne’eba atu lejitima papél ne’ebé mak desempeña ona husi lideransa komunitáriu nomos estruturas komunitárius sira, atráves husi eleisaun Suku tuir lei no. 2/2004.

Antes de eleisaun Suku 2004, na realidade, lideransa komunitáriu nomos estruturas komunitárius sira iha ona papél importante ida hodi organiza komunidades ne’ebé maka tenki rekoñesidu husi Estadu tamba Estadu mos depende ba sira hodi organiza, nomos mobiliza komunidade sira iha nível Suku ba dezenvolvimentu sócio-ekonomiku no kultural Timor-Leste nian.

Governu liu husi Ministério Administrasaun Estatál e Ordenamentu Território liu husi IV Governu Konstitusional, Governu kontinua hala’o servisu maka’as hodi kria lei no. 3/2009 defini lideransa komunitáriu sira nu’udar pessoal koletiva atu organiza partisipasaun sidadaun hodi fó solusaun ba sira nia problema rasik no hala’o planu programa ne’ebé deside hamutuk ho komunidade. Dekretu lei ne’e mos hateten katak lideransa lokal Chefe do Suku eleitu husi komunidade liu husi eleisaun geral ho liverdade no demokrasia.

Depois de hetan direitu hanesan Chefe do Suku ka lideransa lokal, liu husi eleisaun geral no sei lidera komunidade iha Suku laran ho durasaun tempu tinan 6 (ne’en). Atu hala’o servisu ho efektivu no efisensia, responsabilidade no papél lideransa lokal iha Dekretu Lei no. 3/2009 ne’ebé hateten mos katak responsabilidade no papél lideransa lokal hanesan tuir mai ne’e:

1.        Koordena implementasaun hodi foti desijaun husi Konsellu do Suku no halo koordenasaun ho membrus Konsellu do Suku sira seluk.

2.        Promove prosesu konsultasaun no diskusaun ne’ebé kontinua nafatin iha komunidade hotu konaba planeamentu no ezekusaun ba programa dezenvolvimentu komunitáriu.

3.        Halo kooperasaun ho administrasaun municipal no reprezentante governu konaba adopta prosedimentu hotu ba dezenvolvimentu Suku.

4.        Resolve problema ka konflitu ki’ik ne’ebé mosu entre Aldeia ida ka rua ne’ebé iha Suku.

5.        Promove no kriasaun atu bele halo prevensaun ba violênsia doméstika.

6.        Iha inisiativa atu fó apoiu no akompaña vítima violênsia doméstika no tratamentu no kastigu ba agresor atu nune’e bele halakon kazu ne’e iha komunidade nia le’et.

7.        Husu intervensaun ba parte seguransa se wainhira mosu konflitu ka violênsia ida ne’ebé lahetan solusaun iha nível lokal no sai hanesan provokasaun.

8.        Apresenta ba aprovasaun iha Konsellu do Suku konaba relatóriu finanseiru annual nomos aktividades dezenvolvimentu nian.

Lider lokal hanesan Chefe do Suku iha papél hodi dirigi aktividades desenvolvida husi nia komunidade sira hodi kontribui ba konsolidasaun unidade nasional, produsaun bens no serbisu ne’ebé mak destinadu ba satisfasaun ba nessesidades básikas husi vida nomos dezenvolvimentu iha Suku nian. Chefe do Suku nomos nia membros Konsellu do Suku hetan autorizasaun hodi desempeña iha aktividades iha áreas sira ne’ebé mak hanesan paz no harmónia social, recenseamentu no registu populasaun, edukasaun sívika, promosaun ba línguas oficiais, seguransa alimentar, proteksaun ba meio ambiente, edukasaun, kultura no desportu.

Wainhira exerse sira nia funsaun iha área ne’ebé mak estabelesidu husi leis no regulamentus, membros konsellu de Suku sira sempre halo artikulasaun ho administrasaun lokal, partikularmente ho administrasaun Sub-distritu ne’ebé mak geografikamente besik liu ba sira. Komu Suku hanesan autoridades komunitárius no laos parte husi administrasaun Sub-distritu, Governu sempre trata Suku sira hanesan autoridades komunitárius ne’ebé mak organiza sira nia komunidade hodi halo dezenvolvimentu iha sira nia Suku laran. Mesmo hanesan ne’e, governu fasilita servisu membrus Konsellu do Suku sira atraves husi fo insentivus ba membrus sira nomos fo fundu administrasaun Sukus.

Bazeia ba regulamentu no dekreitu lei konaba papél lideransa lokal atu exerse nia funsaun hodi organiza komunidade atu dezeña planu programa ba dezenvolvimentu Suku liu-liu iha Suku Pairara, realidade ne’ebé iha dezenvolvimentu Suku iha parte balun ne’ebé fó progreso no parte balun ne’ebé sei sai hanesan difikuldade ba komunidade, tantu iha dezenvolvimentu fisiku no non fisiku, relasaun ho fatór ida ne’e Suku Pairara mudansa husi dezenvolvimentu ne’ebé hetan agora dadaun la ses husi nível edukasaun ne’ebé komunidade no lideransa lokal husi Suku Pairara mínimu liu, ho nível edukasaun ne’ebé mínimu bele fó impaktu ba planu programa Suku nian iha dezenvolvimentu Suku. Tamba ne’e atu atinji objetivu husi denzenvolvimentu lokal iha Suku maka: importante tenki iha partisipasaun komunidade ba programa dezenvolvimentu lokal Suku, partisipasaun komunidade ne’ebé mensiona atu fó forsa no motivu ba iha komunidade no lideransa komunitáriu sira oinsa atu iha kreatividade ba iha dezenvolvimentu Suku.

Efektivu no efisiensia husi dezenvolvimentu iha Suku importansia liu hare husi papél lideransa lokal no Konsellu Suku alende mos iha kapasidade servisu, no konsiênsia komunidade iha Suku Pairara. Papél lideransa lokal hanesan fatór determinante iha susesu dezenvolvimentu Suku, tamba ne’e importante tebes atu organiza komunidade no halo planu programa ba dezenvolvimentu Suku liu husi hasa’e kapasidade no kualidade rekursus humanus iha Suku laran. Suku hanesan komponenti husi estrutura ne’ebé importante iha guvernasaun laran, tamba involvimentu husi komunidade ne’ebé ho kapasidade mínimu, maka iha prosesu dezenvolvimentu iha Suku la lao, alende kapasidade komunidade ne’ebé mínimu tebes atu fó nia kontribusaun ba iha prosesu dezenvolvimentu Suku, nune’e mos falta motivasaun atu hasa’e kualidade edukasaun no aumenta kapasidade liu husi aktividade social, treinamentu hodi suporta ka apoiu implementasaun programa Suku.

Bazeia ba enkuadramentu ne’ebé iha, bele konklui katak papél lideransa lokal iha dezenvolvimentu komunitáriu importânsia tebes atu organiza no mobiliza komunidade no halo planu programa ba dezenvolvimentu iha Suku laran, tantu programa Guverno sentral no Governu lokal Suku Pairara. Tamba ne’e hakerek nain ho objetivu hodi hili títulu “Papél Lideransa Lokal iha Dezenvolvimentu Komunitáriu”

1.2  Formulasaun Problema

Bazeia ba enkuadramentu dahuluk, katak problema ne’ebé atu foti hodi formula maka: “Oinsa Papél Lideransa Lokal iha Dezenvolvimentu Komunitáriu”?

1.3  Objetivu Peskiza.

Objetivu husi peskiza mak hanesan:

1.      Atu deskreve papél lideransa lokal ba implementasaun dezenvolvimentu lokal partikularmente iha Suku Pairara.

2.      Atu identifika mos fatóres ne’ebé fó obstaklu ba dezenvolvimentu lokal iha Suku Pairara.

3.      Atu deskreve progressu ka susesu husi dezenvolvimentu lokal iha Suku Pairara.

1.4  Benefisiu Peskiza.

Benefisiu husi peskiza ida ne’e maka hanesan;

1.      Nu’udar referênsia ba Universitariu sira liu-liu hirak ne’ebé estudu iha Departamentu Dezenvolvimentu Komunitáriu.

2.      Hanesan referênsia ba peskizador sira seluk ne’ebé iha relasaun ho tópiku peskiza ida ne’e.

3.      Rejultadu peskiza ne’e sei fó benefisiu ba lideransa local sira ba iha prosesu dezenvolvimentu komunitáriu partikularmente ba Suku Pairara.

1.5  Razaun Hili Títulu.

Razaun hili títulu peskiza konaba papél lideransa lokal iha dezenvolvimentu komunitáriu hanesan tuir mai ne’e:

1.      Tamba durante ne’e seidauk iha peskizador ida mak hala’o peskiza specífiku liu ba tópiku peskiza konaba papél lideransa lokal iha dezenvolvimentu komunitáriu partikularmente iha Suku Pairara.

2.      Komunidade iha Suku Pairara mos presiza dezenvolvimentu ne’ebé balansu ho Suku sira seluk.

3.      Atu hatene detallu konaba papél lideransa lokal iha dezenvolvimentu komunitáriu partikularmente iha Suku Pairara.

1.6  Sistemátika Hakerek

Sistemátika hakerek monografia ne’e kompostu husi kapitulu V hanesan tuir mai ne’e:

v  Kapítulu I: Kompostu husi enkuadramento peskiza, formulasaun problema, objetivu peskiza, benefisiu peskiza, razaun hili títulu no sistemátika hakerek.

v  Kapítulu II: Koalia konaba revisaun literatura husi peritus nain sira ne’ebé iha relasaun ho tópiku husi monografia.

v  Kapítulu III:  Metodológia peskiza.

v  Kapítulu IV: Koalia konaba deskrisaun área peskiza no análiza husi rejultadu peskiza.

v  Kapítulu V: Konsiderasaun ikus/ maktaka.

KAPÍTULU II

REVISAUN LITERATURA

2.1  Papél Lideransa Lokal.

Bazeia ba dekreitu lei no 3/2009 konaba kna’ar lideransa komunitáriu nian, ne’ebé koalia espesífiku konaba lideransa komunitáriu no oinsa lideransa komunitáriu sira hala’o sira nia kna’ar ka servisu iha Suku.[2]

A. Kna'ar Chefe do Suku.

1.         Kna’ar Chefe do Suku atu representa Suku nian no mo’os atu lidera reuniaun sira ho konsellu do Suku ho didiak, independenti tuir nia funsaun servisu.

2.         Hala’o kna’ar hanesan:

a)      Koordena implementasaun no foti desijaun husi Konsellu do Suku no halo koordenasaun ho membrus Konsellu do Suku sira seluk, promove prosesu konsultasaun no diskusaun ne’ebé kontinua nafatin iha komunidade hotu konaba planeamentu no ezekuasaun ba programa dezenvolvimentu komunitáriu.

b)      Halo kooperasaun ho administrasaun municipal no reprezentante governu konaba adopta prosedimentu hotu ba dezenvolvimentu Suku.

c)      Resolve problema ka konflitu ki’ik ne’ebé mosu entre Aldeia ida ka rua ne’ebé iha Suku.

d)     Promove no kriasaun atu bele halo prevensaun ba violênsia doméstika.

e)      Iha inisiativa atu fó apoiu no akompanha vítima violênsia doméstika, tratamentu no kastigu ba agresor atu nune’e bele halakon kazu ne’e iha komunidade nia le’et.

f)       Husu intervensaun ba parte seguransa se wainhira mosu konflitu ka violênsia ida ne’ebé la hetan solusaun iha nível lokal no sai hanesan provokasaun.

g)      Apresenta ba aprovasaun iha Konsellu do Suku konaba relatóriu finanseiru annual nomo’os aktividades dezenvolvimentu nian.

h)      Halo servisu ka exersisiu seluk ne’ebé mak tuir Governu ka Administrasaun Distritu haruka.

B. Kna'ar Konsellu do Suku.

a.              Fó apoiu no kolabora ho Chefe do Suku hodi halo planu annual dezenvolvimentu iha Suku laran.

b.             Fó konsellu ba Chefe do Suku hodi buka solusaun no hodi hare dezenvolvimentu aktividade ba Suku laran.

c.              Identifika, halo planu atu exekuta aktividade iha área Saúde, Edukasaun, Meiu Ambiente, promosaun ba serbisu nian, seguransa alementar/aihan, buat seluk tan ne’ebé bele dezenvolve iha Suku nia laran.

d.             Halo inkontru bebeik ho nível Suku ho objetivu atu diskuti planu no aktividades dezenvolvimentu nian.

e.              Promove no respeitu ba prinsipiu igualdade nian.

f.              Promove no respeitu ba meiu ambiente.

g.             Tau-matan no respeitu ba tradisaun ne’ebé iha Suku laran.

h.             Kolabora ho Governu no Administrasaun Munisipal iha implementasaun programa sira nomo’os promove dezenvolvimentu iha Suku laran.

i.               Hato’o programa ba Ministério da Administrasaun Estatál e Ordenamento do Teritóriu dos rekursus hodi simu orsamento jeral husi Estadu.

C. Kna’ar Chefe Aldeia.

a.       Reprezenta ninia Aldeia iha konsellu do Suku.

b.      Implementa desizaun sira ne’ebé mak aprova tiha ona husi konsellu Suku nian ne’ebé maka iha implikasaun ba Aldeia.

c.       Fó ba Chefe Suku saida maka nia husu, presiza mós koordenasaun ho Ministériu sira no Administrasaun.

d.      Favorese hodi hari’i estrutura bázika sira hodi halo kompozisaun no resolusaun konaba konflitu ki’ikoan sira ne’ebé maka mosu iha Aldeia.

e.       Provome konaba respeitu ba lei no kolabora hodi buka estabilidade social.

f.       Garante atu hari’i mekanismu sira ne’ebé oinsa atu halo prevensaun ba violênsia doméstika, liu-liu husi kampaña sira konaba edukasaun sívika iha Aldeia ne’e rasik.

g.      Fasilita hodi hari’i mekanismu sira konaba oinsa atu proteje vítima sira violênsia doméstika nian no mós indikasaun sira seluk ne’ebé hanesan ho gravid/todan husi situasaun kazu ida-idak nian.

h.      Promove konsulta no diskusaun entre mahorik sira Aldeia ne’e nian konaba assuntu sira hotu ne’ebé konaba vida moris.

i.        Hala’o kompetênsia seluk ruma ne’ebé maka tuir ninia kna’ar sira.

D. Kna’ar Reprezentante Feto Sira.

a.    Buka hatene problema feto sira no labarik sira nian.

b.    Asegura katak konsellu Suku iha reasaun ba problema konaba feto no labarik sira.

c.    Halo proposta konaba projetu sira hodi hasa’e estatutu feto nian iha Suku laran.

d.   Luta hodi prevene violênsia kontra feto sira

Figura 6

.

e.    Ajuda feto no labarik sira ne’ebé sai vítima ba violênsia doméstika.

E. Kna’ar Reprezentante Joven Sira.

a.       Servisu besik liu ho Chefe Aldeia sira no membru konsellu Suku sira seluk hodi hatene problema juventude sira nian no buka dalan oinsa atu rezolve problema hirak ne’e.

b.      Tenki hahú ho konsultasaun entre juventude sira hodi diskuti konaba dalan oinsa atu kontribui ba dezenvolvimentu Suku nian.

c.       Tenki servisu besik liu ho Chefe Aldeia no membru konsellu Suku sira seluk hodi prevene violênsia entre grupu joven sira.

d.      Tenki identifika no hahú ho projetu sira ne’ebé maka iha relasaun ho dezenvolvimentu juventude iha Suku.

e.       Fó konsellu ba Chefe Suku assuntu hirak ne’ebé relasiona ho dezenvolvimentu iha setór juventude nian iha Suku laran.

F. Enkontru Konsellu Suku.

a.       Konsellu Suku bele hala’o enkontru iha sesaun ordinária fulan ida dala ida.

b.      Chefe Suku ou um kuartu (1/4) husi membru konsellu sira bele konvoka enkontru espesial ida.

c.       Atu fó deliberasaun ka desizaun konsellu hodi ejize prezensa husi metade ba leten husi nia membru sira.

d.      Desizaun sira husi konsellu maioria simples husi membru sira ne’ebé marka prezensa iha reuniaun ne’e.

e.       Wainhira iha empate (seri) ida durante votasaun, Chefe Suku nu’udar prezidente konsellu, mak halo votu de kualidade.

f.       Chefe Suku bele konvida kualkér sidadaun atu partisipa iha enkontru konsellu Suku nian.

G. Direitu Chefe Suku no membru Konsellu Suku sira nian.

Chefe Suku no membru konsellu Suku, durante hala’o sira nia kna’ar, sira iha direitu hanesan hirak tuir mai ne’e.

1.      Direitu atu simu insentivu ida, ne’ebé propoin husi Ministériu da Administrasaun Estatál e Ordenamentu Território.

2.      Chefe Suku no Aldeia sira iha direitu ba subsídiu fiksu tuir sira nia prezensa iha reuniaun.

3.      Membru konsellu Suku sira seluk iha direitu ne’ebé hanesan tuir sira nia prezensa iha reuniaun.

H. Konsellu Suku sira iha direitu atu simu:

1.      Matérial hirak ne’ebé atu uza hodi bele hala’o sira nia kna’ar.

2.      Formasaun no trenamentu hodi hasa’e sira nia kapasidade.

3.      Kompensasaun husi estadu ou kualkér assidente wainhira sira hala’o hela sira nia funsaun.

4.      Governu ho munisípiu sei fornese rekursu matérial sira no finanseiru ba Suku sira hodi assegura sira nia funsionamentu no dezenvolvimentu ne’ebé diak.

5.      Montante ne’ebé atu fó ba Suku, tenki propoin husi Ministériu da Administrasaun Estatál e ordenamentu terrritóriu ou assembleia municipal maka responsavel ba proposta hirak ne’ebé aprezenta husi konsellu Suku.

2.1.1 Konseitu Teorítiku Konaba Papél

Papél hanesan aspeitu dinámiku husi pozisaun (status), ne’ebé ema individu tutur ho responsabilidade moral relasiona ho nia pozisaun. Tuir Peritus nain, Dewi S. Baharata (1983:375) iha disionariu lian Indonesia ne’ebé hateten katak papél hanesan parte husi servisu ka mandatu prinsipal ne’ebé tenke hala’o. “Dalam kamus umum bahasa Indonesia yang menyatakan bahwa: peranan adalah bagian dari tugas utama yang harus di laksanakan.”[3]

Alende ne’e mos Peritus nain Paul B. Harton fó nia definisaun konaba papél hanesan atitude ne’ebé fó esperansa ba ema individu iha pozisaun(status), nune’e mos iha definisaun seluk konaba papél hanesan apparatus direitu no dever.

“Perilaku diharapkan seseorang yang mempunyai estatus selanjutnya ia mengatakan bahwa dalam arti tertentu bahwa status dan peranan adalah seperangkat hak dan kewajiban”[4]

Iha parte seluk tuir Peritus nain Thibaut dan Kelly mos hateten papél hanesan modelu husi atitude ho esperansa husi individu ba ema seluk wainhira hala’o interaksaun sosial ho ema seluk “suatu pola perilaku yang diharapkan dari seseorang oleh orang lain bila ia melakukan interaksi dengan mereka’’[5]

Relasiona ho hanoin balun husi Peritus nain iha leten maka Meredith Belbin (1981:114) klarifika klean liu tan konaba papél hanesan individu ne’ebé iha ideias, kreatividade, kargu no dalaruma kontribui halo aprosimasaun foun oinsa atu rejolve problema.

“Peranan adalah seseorang munking memiliki bermacam-macam gagasan, kreativitas, tugas dan kemunkinan besar dapat menyumbankan pendekatan baru terhadap penyelesaian masalah (manusia, tugas, dan gagasan)”[6]

Husi Peritus nain sira nia hanoin konaba definisaun papél maka hakerek nain halo konklusaun katak susesu husi planu ka programa la ses husi papél prinsipal Lideransa, tantu individu nomo’os sistema kolektividade iha komunidade hanesan mos parte integrado ne’ebé importânsia iha prosesu ka sistema dezenvolvimentu. Ho papél katak atu hiti servisu ka mandatu ida iha prosesu foti desizaun hanesan lideransa.

2.1.2 Konseitu Teorítiku Konaba Lideransa

Lideransa tuir matenek nain Hendry Pratt Fairchild hateten katak lideransa iha definisaun luan ne’ebé ema individu iha inisiativa hodi lidera ho komportamentu sosial atu regula, diriji, organiza no kontrola ema seluk liu husi prestasaun, kompetênsia no pozisaun.

“Pemimpin dalam pengertian luas telah seseorang memimpin dengan jalan memprakarsai tingkahlaku sosial dengan mengatur, mengarahkan, mengorganisir, mengontrol usaha/upaya orang lain melalui prestasi, kekuasaan atau posisi”[7]

Assuntu hanesan hatutan husi Winardi S.E, katak lideransa hanesan ema individu (Mane no Feto), ne’ebé husi organizasaun refere (Governu ka organizasaun privado) ne’ebé eleitu bazeia ba desizaun husi organizasaun refere, atu hiti mandatu husi organizasaun refere, ne’ebé iha relasaun ho direitu no dever, atu atinji organizasaun nia targetu.

“Seseorang (Pria dan Wanita), yang oleh organisasi tertentu (swasta atau pemerintah) dipertunjukkan (Berdasarkan surat-surat keputusan pengangkatan dari organisasi yang bersangkutan) untuk memanku sesuatu jabatan dari organisasi yang ada, dengan segala hak dan kewajiban yang berkaitan dengannya, untuk mencapai sasaran organisasi yang ditetapkan semula.”[8]

      Tuir Kartini Kartono (1994:33) lideransa hanesan individu ida ne’ebé iha abilidade no espesialidade ida, área ida, hodi nune’e bele fo influênsia ba ema seluk hodi hamutuk hala’o aktividade refere, atu atinji objetivu ne’ebé iha.

“Pemimpin adalah seorang pribadi yang memiliki kecakapan dan kelebihan khususnya kecakapan dan kelebihan disatu bidang, sehingga dia mampu mempengaruhi orang-orang lain untuk bersama-sama melakukan aktivitas-aktivitas tertentu, demi pencapaian satu atau beberapa tujuan”[9].

Nune’e mos tuir matenek nain Terry (Principles of Development), hateten katak iha teória 8(ualu) husi lideransa mak hanesan:

1. Teória Otokratis, hanesan Lideransa mak iha poder hotu-hotu iha organizasaun ruma, Lideransa nia tendênsia ba obrigatório, membru hotu-hotu tenki rona no tuir lider nia hakarak. “Teori yang didasari oleh perintah-perintah, pemaksaan dan tindahkan agak arbiter dalam hubungan pimpinan dengan bawahan”.
2. Teória Psikologis, hanesan Lideransa fó nia istimulasaun ba nia membru sira atu atinji objetivu organizasaun nune’e mos objetivu Lideransa nian. “Seorang pemimpin memberikan ransangan kebawahannya untuk mencapai tujuan organisasi maupun tujuan mereka”.
3. Teória Sosiologis, Lideransa mak ekspresa atu partisipa iha organizator atu rezolve konflitu, determina objetivu no foti desizaun ikus. “Pemimpin yang mengatakan pengikut dalam organisatoris untuk menyelesaikan konflik dan menetapkan tujuan-tujuan dan pengambilan keputusan terakhir”.
4. Teória Sportif, Lideransa mak fó suportasaun ba nia membru sira atu hasa’e sira nia abilidade atu servisu hamutuk ho ema seluk no kria relasaun servisu ho diak. “Pemimpin memberikan support kepada pengikut-pengikutnya untuk meningkatkan kemampuan melakukan kerjasama dengan orang lain dan menciptakan hubungan kerja dengan baik”.
5. Teória Laissez Faire, Lideransa ne’ebé baruk-ten no dependênsia maka’as ba nia membru sira, nune’e mos fó liberdade ba nia membru sira atu hala’o servisu nu’udar membru no nia lapartisipa. “Pemimpin memberikan kebebasan seluas-luasnya kepada bawahan dalam hal menentukan aktivitas mereka dan ia tidak ikut berpartisipasi”
6. Teória Perilaku Pribadi, Lideransa presija mos estuda liu husi kualidade privadu hodi sai hanesan modelo Lideransa ne’ebé diak. “Kepemimpinan dapat pula dipelajari berdasarkan kualitas pribadi ataupun pola-pola kelakuan para pemimpin”
7. Teória Sifat, Lideransa tenki iha natureza rasik ne’ebé atu halo prediksaun no klarifika susesu husi lideransa. “Seorang pemimpin harus memiliki sifat yang dapat meramalkan dan menerangkan kesuksesan seseorang dalam memimpin”.
8. Teoória Situasi, Lideransa tenki fleksibel atu lidera no halo adaptasaun iha situasaun saida deit. “Kepemimpinan menyatakan bahwa harus terdapat cukup banyak fleksibilitas dalam kepemimpinan dalam menyesuaikan diri dengan berbagai macam situasi”[10]

Ralasiona ho hanoin sira husi Peritus nain iha leten konaba definisaun Lideransa, hakerek nain bele foti konklusaun katak Lideransa ne’ebé efektivu (relasaun ho nia membru ka staff ) hanesan lideransa ne’ebé iha esperansa katak nessesidade privado membrus nian parte husi visaun Lideransa nian. Lideransa hanesan sasukat no save ba susesu iha organizasaun nia laran, lideransa hanesan forsa aspirasaun, iha power, espíritu moral ne’ebé kreativu, atu bele influênsia komunidade sira liu husi dalan legal ba moris diak komunidade.

2.1.3 Konseitu Teorítiku Konaba Lideransa Lokal.

Bazeia ba dekreitu Lei no. 3/2009 konaba kna’ar lideransa Komunitáriu nian, iha artigu 2 (Definisaun Lideransa Komunitáriu) katak:

“Lideransa Komunitáriu ne'e kolektivu (Pakote) ne’ebé ho objetivu atu organija partisipasaun komunidade sira atu resolve sira nia problemas, tau interese ne’ebé sempre sai hanesan nesesidade liu. Lideransa Komunitáriu ne'e exersida husi Chefe do Suku no Konsellu do Suku, iha limitasaun ba Suku no aldeia ketak-ketak, eleito tuir akordu ne’ebé termina husi dekreitu lei refere.”[11]

Tuir Peritus nain Ordway Tead, (1935: 12), Lideransa lokal hanesan aktividade ne’ebé fo influênsia ba ema atu nune’e bele iha kolaborasaun hamutuk hodi atinji objetivu komum. “Kepemimpinan desa adalah aktivitas mempengaruhi orang-orang agar mau bekerja sama untuk mencapai beberapa tujuan yang mereka inginkan” [12]

Nune’e mos tuir Ralp M. Stogdill, (1950: 13), hateten katak lideransa lokal hanesan prosesu influênsia iha aktividade no grupu ne’ebé organizadu ho esforsu hodi atinji objetivu ne’ebé iha. “Kepemimpinan desa adalah proses mempengaruhi kegiatan sekelompok orang yang terorganisir dalam usaha mereka menetapkan tujuan dan mencapai tujuan” [13]

Bazeia ba hanoin iha leten nu’udar peskizador halo rezumu katak hanesan Lideransa Lokal tenki iha abilidade no kreatividade ho hamosu ideia ne’ebé diak no bele fo influênsia ba ema individo ou grupu ne’ebé moris iha komunidade ida, hodi bele atinji objetivu ne’ebé positivu.

2.2    Konseitu Teorítiku Konaba Dezenvolvimentu Komunitáriu

            Aprosimasaun komunidade tuir matenek nain Prof. Dr. P. Janssen, iha nia Livru Teknik-Teknik pembangunan Masyarakat hateten dezenvolvimentu Komunitáriu katak: konsiênsia konaba mudansa komunidade hanesan prosesu ne’ebé multi-dimensional katak rezultadu husi progresu sosiologia moderno. “kesadaran tentang perubahan masyarakat sebagai proses yang multi-dimensional yaitu suatu hasil dari kemajuan sosiologi modern”[14]

Dezenvolvimentu komunitáriu tuir matenek nain Agusthoa, (1985;24 fo definisaun katak dezenvolvimentu komunitáriu (Suku) hanesan dezenvolvimentu ne’ebé  diriji atu hasa’e padraun moris no bem estar komunidade.“Pembangunan Desa adalah suatu pembangunan yang diarahkan untuk meningkatkan taraf hidup dan kesejahteraan masyarakat”[15]

Kesataun hanesan hatutan husi T.R Batten iha nia Livru “Communities and Their Development” (di sadur oleh Drs. A. Suryady), komesa fó nia limitasaun konaba Dezenvolvimentu Komunitáriu Suku hanesan prosesu, iha ne’ebé komunidade sira halo adaptasaun ba mudansa no agênsia sira hala’o nia kna’ar servisu iha dezenvolvimentu Suku.

“Pembangunan masyarakat desa adalah proses dimana masyarakat mengadaptasi dirinya kepada perubahan dan badan yang bergerak dibidang pembangunan desa itu, adalah organisasi luar yang mencoba menolong proses  itu dan mempercepatnya”.[16]

Hanoin hanesan tuir Peritus nain Prof. P. Janssen hateten katak dezenvolvimentu komunidade hanesan prosesu ne’ebé multi-dimensional ne’ebé estrukturalmente, mudansa etruktural inklui mos iha aspeitu sosiedade, ne’ebé presija tebes liu-liu iha dezenvolvimentu ekonómia Suku.

“Pembangunan masyarakat adalah suatu proses yang multi-dimensional yang estruktural, perubahan estruktural meliputi semua segi aspek kemasyarakatan, tetapi pada permulaan diperlukan terutama pembangunan ekonomi”[17]

Bazeia ba Peritus nain nia hanoin bele konklui katak atu dezenvolve komunidade iha Suku lolo’os tenki iha balansu entre komunidade no orgaun Governu lokal. Dezenvolvimentu Suku tenki lao tuir prosesu legal atu hasa’e padraun moris komunidade no prioridade liu mak komunidade iha Suku bele partisipa mos prosesu dezenvolvimentu ne’ebé lao dadaun iha komunidade nia le’et. Atu atinji mos objetivu husi dezenvolvimentu ne’e rasik presija konsiênsia komunidade no halo kolaborasaun ho lideransa lokal hodi servisu hamutuk iha prosesu nia laran.

2.2.1 Konseitu Teorítiku Konaba Dezenvolvimentu

     Desde sai independente, iha 2002, Timor-Leste hetan progresu barak duni, hodi temi nu’udar kazu susesu ida, iha Paízes ne’ebé foin hakat ba dezenvolvimentu no mai husi situasaun Pós-Konflitu. Polítikas sosiais no ekonómikas, iha última dékada (ka tinan sanulu nia laran), la’os orienta deit ba redusaun pobreza no ba konsolidasaun seguransa no estabilidade Nasaun nian, maibé mos fó atensaun tomak ba konstrusaun pilares fundamentais Instituisoens Estadu nian.

Prosesu ne’ebé kontinua ba konsolidasaun páz no ba konstrusaun Estado, fundamental tebes, lori hatán ba nessesidades ita nia povo nian, iha saúde, edukasaun no erradikasaun pobreza extrema. Abordagem ida ne’e hatudu katak diak duni, tamba bainhira kompara ho Países sira seluk, ke kostuma lori tinan 10 to'o 15 atu rekupera estabilidade, Timor-Leste konsegue ho tempo menos de tinan sanulu (10), sai hanesan País seguru ida.

Assuntu iha leten tuir Peritus nain Koentjaraningrat (1997), fó nia definisaun katak dezenvolvimentu hanesan serangkaian upaya ne’ebé planeadu no hala’o husi Governo, Agênsias, Instituisaun Internasional, Nasional ka Lokal ho inisiativu husi desizaun, programa ka projetu ne’ebé planeado atu hadia komunidade ho bem estar komunidade nian.

”Pembangunan sebagai serangkaian upaya yang direncanakan dan dilaksanakan oleh pemerintah, badan-badan atau lembaga-lembaga Internasional, Nasional atau Lokal yang terwujud dalam bentuk kebijaksanaan, programa atau proyek, yang secara terencana mengubah cara-cara hidup atau kebudayaan dari sesuatu masyarakat sehingga warga masyarakat tersebut dapat hidup lebih baik atau lebih sejahtera daripada sebelum adanya pembangunan tersebut”.[18]

Assuntu hanesan hatutan husi Rogers 1983 mos fó nia definisaun konaba dezenvolvimentu hanesan prosesu mudansa sosial ho partisipatória ne’ebé luan iha komunidade ho objetivu ba mudansa sosial no material (alende aumenta mos justisa, liberdade no kualidade seluk ne’ebé reseu) maioria husi komunidade liu husi kontrolu ne’ebé bo’ot iha sira nia ambiente.

“Pembangunan adalah suatu proses perubahan social dengan partisipasi yang luas dalam suatu masyarakat yang dimaksudkan untuk kemajuan sosial dan material (termasuk bertambah besarnya keadilan, kebebasan dan kualitas lainnya yang dihargai) oleh mayoritas rakyat melalui kontrol yang lebih besar yang mereka peroleh terhadap lingkungan mereka”.[19]

Nune’e mos Inayatullah, 1967, reforsa liu tan katak dezenvolvimentu hanesan mudansa ne’ebé hahú husi komunidade atu loke dalan ba realidade ne’ebé diak husi valor humanitária (kemanusiaan), ne’ebé loke dalan ba komunidade sira atu kontrola nia ambiente no konsidera objetivu polítika.

“Pembangunan ialah Perubahan menuju pola-pola masyarakat yang memungkinkan realisasi yang lebih baik dari nilai-nilai kemanusiaan, yang memungkinkan suatu masyarakat mempunyai kontrol yang lebih besar terhadap lingkungannya dan terhadap tujuan politiknya, dan yang memungkinkan warganya memperoleh kontrol yang lebih terhadap diri mereka sendiri”.[20]

Relasiona ho hanoin no teória husi Peritus nain ne’ebé mensiona iha leten konaba definisaun husi dezenvolvimentu, tuir hakerek nain nia haré katak dezenvolvimentu hanesan prosesu mudansa ne’ebé iha tenki sustentabel maske liu husi etapa ba etapa, maibe iha objetivu prinsipal no fundamentu liu mak dezenvolvimentu ne’ebé atu hasa’e padraun moris komunidade no bem estar komunidade nian.

2.2.2 Konseitu Teorítiku konaba Komunitáriu / Komunidade

Definisaun husi Komunitáriu iha disionariu Lingua Ingles katak Society, mai husi liafuan Socius, mak hanesan “kawan / kolega”. Liafuan “Komunidade (Masyarakat)” mai husi lian Arab, mak hanesan Syiek, siknifika katak “interaksi (bergaul)”Hamosu interaksaun tamba iha komunidade.

Assuntu iha leten tuir Peritus nain Antropologia (R. Linton) komunidade hanesan grupu ida ne’ebé moris nanis hamutuk no servisu hamutuk, tamba ne’e sira bele organiza-an hodi hanoin kona ba unidade sosial ho baliza sira seluk.

“Masyarakat adalah setiap kelompok manusia yang telah cukup lama hidup dan bekerjasama, sehingga mereka ini dapat mengorganisasikan dirinya berfikir tentang dirinya dalam satu kesatuan sosial dengan batas-batas tertentu.”[21]

Assuntu hanesan hatutan husi PAUL B. HORTON katak komunidade hanesan moris hamutuk komunidade ho relative independen ne’ebé moris hamutuk iha tempu barak, ne’ebé koloka hamutuk iha área refere, iha mos kultura ne’ebé hanesan no iha kolaborasaun diak iha servisu aktividade ruma.

“Masyarakat adalah sekumpulan manusia yang secara relative mandiri, yang hidup bersama-sama cukup lama, yang mendiami suatu wilayah tertentu, memiliki kebudayaan yang sama dan melakukan sebagian besar kegiatan dalam kelompok itu”[22].

Nune’e mos tuir Peritus nain Selo Sumarjan reforsa liu tan katak komunidade hanesan ema ne’ebé moris hamutuk iha kultura ida nia laran. “Mengatakan bahwa masyarakat adalah orang-orang yang hidup bersama, yang menghasilkan kebudayaan”[23].

Tuir Peritus nain sira ne’ebé fó nia hanoin konaba definisaun Komunidade, maka hakerek nain foti konklusaun katak komunidade hanesan grupo ka ema ne’ebé moris hamutuk iha ambiente ida ne’ebé moris hamutuk ho durasaun tempu ne’ebé naruk, inklui mos sira rekonhese katak sira iha unidade no moris hamutuk iha sistema ida nia laran.

KAPÍTULU III

METODOLOGIA PESKIZA

3.1         Ambitu Peskiza

Métodu peskiza hanesan maneira ida ne’ebé peskizadór uza atu hala’o peskiza hodi nune’e bele buka no halibur dadus. Dadus sira ne’ebé lo’os ho intensaun atu dezenvolve no ezamina husi ciênsia. Ho nune’e métodu ne’ebé uza ba peskiza ida ne’e mak métodu peskiza kualitativu deskritivu. Signifika atu hetan konseitu ba problema ida ne’ebé deskreve ka hakerek kondisaun husi objetu peskiza iha tempu agora. Bazeia ba faktus ka buat ne’ebé iha hanesan instrumentu kualitativu liu husi intervista, observasaun no dokumentasaun seluk tan, atu nune’e bele produs no deskobre ba buat foun ne’ebé iha benefísiu dezenvolvimentu lokal liu-liu iha Suku no Aldeia

3.2         Populasaun no Informante Save

Informante Save hanesan parte husi análiza unidade responde balu husi populasaun, maibe iha observasaun hakerek nain sei foti 17 pessoas responde hanesan populasaun ne’ebé iha maka teória ne’ebé  uja atu determina kuantidade husi informante save mak kompostu husi individu hotu ne’ebé sai hanesan objetu peskiza. Objetivu husi informante save (sampel) mak atu foti dadus husi objetu peskiza ne’ebé sai hanesan reprezentante husi total populasaun.

Tuir Peritus nain Igusti Ngaruh Agun hateten informante save hanesan parte unidade observasaun ne’ebé fó nia deklarasaun ou dadus peskiza. “sampel yang didefenisikan sebagai himpunan unit observasi yang memberikan keterangan atau data yang diperlukan untuk satu studi”[24]

3.3              Tipu no Fonte ba Dadus

Iha Peskiza ida ne’e dadus ne’ebé lori uja katak dadus primária no dadus sekundária katak dadus ne’ebé foti direitamente peskizador halibur ou akumula no tau hamutuk dadus ne’ebé hetan husi responde iha kampu peskiza.

3.3.1        Dadus Primária

       Dadus primária mak dadus sira ne’ebé halibur direitamente husi lokasaun peskiza nian liuhusi observasaun no husu direitamente/intervista hodi hetan kedas resposta husi sira ne’ebé mak sai nu’udar informador (Sampel) iha peskizasaun ne’e.

3.3.2   Dadus Sekundária.

       Dadus sekundária hanesan dadus ne’ebé mak hetan liu husi formula dokumentu ne’ebé relevante ho tópiku peskiza nian, no dokumentus (arkivu) ne’ebé tau hamutuk iha edifisiu Suku.

3.4    Tékniku Halibur Dadus

Iha mós métodu ne’ebé uza hodi rekolla dadus sira iha prosesu peskiza nia laran mak hanesan tuir mai ne’e : ho instrumentu hirak ne’e peskizador tau hamutuk informsaun ne’ebé akuradu konaba rezultadu peskiza.

3.4.1        Intervista

Intervista katak sasan téknika ne’ebé utiliza atu bele rekolla dadus ou akumula dadus, ne’ebé iha implementasaun peskizador hasoru malu direitamente ho renpondente sira atu bele hetan informasaun konaba problema ou fenomeno sosial ruma, ne’ebé iha ligasaun ho títulu peskiza nian.

3.4.2        Observasaun

Obserbasaun katak : nu’udar tékniku ne’ebé  uza atu haré, foti notas ka análiza no hakerek sistemátika ba sintoma ne’ebé mosu durante prosesu peskiza ne’e hahú.

3.4.3        Dokumentasaun

Métodu ida ne’e uza atu hatene ka hetan dadus ne’ebé iha relasaun duni ho teória ne’ebé uza ba peskiza ne’e. Dokumentasaun hala’o ba dokumentus ne’ebé iha relasaun ho problema peskiza no prosesu rekolla dadus.

3.5         Fatin no Tempu Peskiza

Peskiza ne’ebé peskizador hala’o iha Suku Pairara, Sub-distrito Lautém, Distrito Lautém ho durasaun tempu konaba peskiza nian komesa sura husi entrega karta despaisu ba Chefe do Suku Pairara ho nia estrutura tomak, to’o loron dada fila fali karta peskiza, ne’ebé hahú husi 01 de Abril 2014 ate 30 de junho 2014

3.6    Save Peskizasaun

Iha prosesu peskizasaun ne’e, sei hetan informasaun ka dadus husi ema ka pessoal save sira iha lokal peskiza ninian. Ema ka pessoal save sira ne’e mak hanesan tuir mai ne’e:

1.      Chefe do Suku (1)

2.      Chefe Aldeias (4)

3.      Rep. Juventude M/F (2)

4.      PAAS (1)

5.      Funsionáriu Públiku (3)

6.      Juventude bai-bain (4)

7.      Komunidade (3)

3.7              Téknika Análiza Dadus

Téknika análiza dadus hanesan prosesu ida halo análiza dadus ida ne’ebé tuir formatu ne’ebé iha, no hala’o tuir teória iha peskiza ne’e nia laran, análiza dadus hala’o hamutuk ho prosesu rekolla dadus, ho ida ne’e mak análiza dadus bele ajuda peskizador iha momentu fó sai dadus sira ne’ebé bazeia ba faktus-faktus ne’ebé iha, no relevante ho problema ne’ebé ita hetan ou detekta.

Atu sai sasukat no análiza dadus iha peskiza ida ne’e uza téknika kualitativu deskriptivu ho matadalan ba argumentu ka ideias hotu. Análiza iha esforsu buka hadi’a ho sistematizasaun hakerek husi rezultadu obervasaun, intervista no dokumentasaun atu hasae ou aumenta komprendesaun peskizador konaba “temuan” ne’ebé baseia ba problema ho kuidadu.

Téknika análiza dadus tuir Patton ( maleong, 2003: 203) katak, prosesu atu ordena no sasukat ba dadus hodi organiza ba iha modelu ida ne’ebé kategória tuir liña fundamentais iha peskiza nia laran. Komesa rekolla dadus no kontinua nafatin to’o remata.[25]

Bazeia ba Peritus nia hanoin iha leten iha sasukat no análiza dadus ne’ebé tau hamutuk halo grupu sai hanesan dadus kualitativu no depois total hamutuk material ho total ne’ebé buka no persentazen sientífiku ne’e depois halo análiza.

Sasukat análiza ida ne’e hala’o ho haré kontribui ba indikasaun ka variabel nune’e mós dadus ne’ebé uza husi sura respondenti, tuir totalidade hamutuk husi ida-idak alternativa respondente ba aspek indikador depois aprezenta.

Análiza ba dadus ne’ebé ho modelu kualitativu deskriptivu ne’ebé uza ho liafuan ka fraze ne’ebé hakfahe tuir kategoria atu halo rezumu maibé dalaruma to’o ona pursentu depois forma halo frazes ne’ebé ho modelo kualitativu deskriptivu bazeia ba definisaun atu análiza dadus ne’ebé hala’o liu husi apresenta fraze no liafuan ne’ebé bele hakman ba dadus ne’ebé halibur ona iha peskiza ida ne’e.

KAPÍTULU IV

DESKRISAUN JERAL BA ÁREA PESKIZA NO

ANÁLIZA REZULTADU PESKIZA

A.    DESKRISAUN JERAL ÁREA PESKIZA

Relasiona ho kapítulu ida ne’e atu deskreve konaba deskrisaun área peskiza ne’ebé iha relasaun ho objetivu husi peskiza nian. Alende iha aspeitu importânsia ne’ebé atu identifika iha kapítulu ida ne’e mak hanesan kondisaun geografia, kondisaun demografia, administrasaun Suku, nomos implementasaun programa dezenvolvimentu iha governu lokal iha Suku Pairara.

Husi aspeitu sira ne’ebé mak temi ona iha leten, mak sei suporta no diskuti konaba objetu ne’ebé iha monografia ida ne’e no deskrisaun jeral sei to’o deit konaba problema peskiza ida ne’ebé mak konsidera nu’udar problema tuir peskizador hanoin ba.

1.         Kondisaun Geografia

1.1  Territóriu no Suku Pairara nia Luan

Territóriu Suku Pairara kompostu husi husi Aldeia hat (4) mak hanesan Aldeia Ira-Tchau, Aldeia Levono, Aldeia Caporo, no Aldeia Puno, ne’ebé pertênsia husi Sub-distritu Lautém, Distritu Lautém husi Suku 10 hanesan Baduro, Com, Daudere, Euquisi, Ililai, Maina I, Maina II, Parlamentu no Serelau. Suku Pairara ho nia luan área 180 km² ho ninia área ne’ebé baliza ho Suku sira maka hanesan:

1)        Husi parte Oeste baliza ho Suku Baduro

2)        Husi parte Norte baliza ho Tasi

3)        Husi parte Este baliza ho Suku Parlamentu

4)        Husi parte Sul baliza ho Suku Raça.

Atu hatene klean liu tan konaba baliza husi Suku Pairara ho Suku vijiñu sira, ita bele haré Mapa Suku Pairara nian tuir mai ne’e;

1.2. Kondisaun Iklima

Bazeia ba pozisaun husi território Suku Pairara nia iklima trópika ou rai manas, Suku Pairara nia tempu ou iklima manas hahú fulan Agostu to’o Novembru no iha tempu udan hahú fali Desembru to’o fulan Jullu.

2.        Kondisaun Demografia

2.1. Populasaun

Tabela 1: Klasifikasaun Populasaun Suku Pairara tuir Aldeia

No	Aldeia	Uma kain	Mane	Feto	Total
1	Ira-tchau	110	280	255	535
2	Levono	107	225	245	470
3	Caporo	32	82	72	154
4	Puno	223	510	495	1005
Total		472	1197	1067	2164

Fontes husi Administrasaun Suku Pairara

Relasiona ho ruzultado kontagen husi tabela 1 iha leten mensiona konaba total populasaun ne’ebé maka hakerek nain deskreve konaba Aldeia ha’at (4) ne’ebé eziste iha Suku Pairara, Total populasaun husi Suku Pairara, Sub-distritu Lautém, Distritu Lautém hamutuk 2.164 kompostu husi Mane hamutuk 1197 no Feto hamutuk 1067 ho uma kain hamutuk 472 uma kain. Relasiona ho dadus ne’ebé importante husi dadus komunidade ka populasaun tuir Aldeia, Uma kain no Sexo iha Suku Pairara.

2.3  Religiaun

Populasaun husi Suku Pairara husi total populasaun hamutuk 2.164 maioria husi Religiaun Khatólika, relasiona ho dadus populasaun husi Administrasaun Suku Pairara katak cen porcento (100%) populasaun Suku Pairara fiar mak Religiaun Kristaun Khatólika.

2.3 Ekonómia Populasaun

Bazeia ba kondisaun sosial ekonómia populasaun Suku Pairara ne’ebé hakerek nain deskreve bazea ba tipu servisu mak hanesan tuir mai ne’e :

Tabela 2: Klasifikasaun Populasaun Suku Pairara Bazeia ba Tipu Servisu

No	Aldeia	F. Publiku		F-FDTL		Polisia		ONG		Agrikultor
		M	F	M	F	M	F	M	F	M	F
1	Ira-tchau	17	-	4	-	1	-	9	-	65	25
2	Levono	14	1	1	1	2	-	12	3	60	15
3	Caporo	3	-	2	-	1	-	7	1	26	10
4	Puno	12	1	1	1	1	-	5	-	130	50
Total		46	2	8	2	5	-	33	4	281	100

Fontes husi Administrasaun Suku Pairara

Relasiona ho klasifikasaun populasaun iha Suku Pairara bazeia ba tipu servisu ne’ebé hakerek nain deskreve iha administrasaun Suku Pairara ne’ebé mensiona iha leten hatudu katak sexo husi funsionário iha Suku Pairara mane mak barak liu feto no maioria vida moris populasaun iha vida Agrikultur. Husi tabela ida ne’e hakerek nain tenta halo rezumu katak laiha equibalênsia entre ema mane ho feto iha Suku Pairara no inisitiva komunidade ne’ebe la iha hodi kompete iha dezenvolvimentu, ikus mai rezulta agrikultor barak iha Suku laran.

2.4 Edukasaun

Edukasaun sai hanesan fatór ne’ebé importante ba dezenvolvimentu nasional tantu mos iha dezenvolvimentu lokal iha mundu globalizasaun ida ne’e, nível edukasaun iha Suku Pairara mak hanesan tuir mai ne’e:

Tabela 3: Klasifikasaun Populasaun Bezeia ba Nível Edukasaun

No	Aldeia	Infantil		Primária		Pre-Sec.		Secundária		Univ.
		M	F	M	F	M	F	M	F	M	F
1	Ira-tchau	23	15	50	38	17	11	11	9	14	2
2	Levono	17	12	46	33	21	16	15	8	16	7
3	Caporo	5	5	18	11	9	6	6	5	1	-
4	Puno	20	13	115	99	34	25	19	12	26	7
Total		65	45	229	181	81	58	51	34	57	16

Fontes husi Administrasaun Suku Pairara

Bazeia ba tabela 3 konaba edukasaun populasaun iha Suku Pairara geralmente hakerek nain deskreve iha Administrasaun Suku identifika katak nível edukasaun iha Suku Pairara diak no iha mudansa tamba maioria populasaun iha nível edukasaun sekundaria ba leten. Relasiona husi tabela iha leten mensiona hakerek nain koko halo rezumu katak maioria populasaun iha Suku pairara iha inisiativu diak no fo importânsia liu ba edukasaun tamba edukasaun sai hanesan fatór determinante iha prosesu dezenvolvimenntu nasional tantu mos iha dezenvolvimentu Suku.

2.4 Saúde, Sanitasaun no Be’e Mos

Geralmente kondisaun saúde populasaun Suku Pairara defisil liu wainhira atu asesu ba Saúde públiku tamba ho distânsia ne’ebé do’ok kuaze km4 husi Suku laran ba sentru Saúde Sub-distritu Lautém. Nune’e mos Be’e mos ne’ebé populasaun Suku Pairara utiliza maka Be’e matan no sistema pompa solar ne’ebé Embaixada Japaun iha Timor Leste, fó orsamentu ba apoiu Organizasaun Naun Governamentál (ONG) Masino Foundation hodi instala sistema pompa solar Be’e mos iha Suku Pairara.

Iha parte seluk bazeia ba assuntu iha leten liu husi observasaun nu’udar peskizador observa katak susesu husi implementasaun programa dezenvolvimentu Suku iha duni progresu bo’ot no bele nesesita nessesidade komunidade iha Suku Pairara, maibe nu’udar peskizador durante iha área refere observa katak iha komunidade Suku Pairara hamutuk uma kain 10 evakua ba parte leste Suku Parlamentu tamba hetan dezastre rai monu iha área refere, uma kain hamutuk 10 to’o agora seidauk assesu ba electrisidade no Be’e mos.

2.5 Governasaun Lokal

Iha Governasaun Lokal tuir Konstituisaun da RDTL no.2/2004 konaba Soberania no Konstitualidade Suku ne’ebé eziste iha territóriu laran tomak. Governasaun lokal  liu-liu Suku Pairara sei fahe ba Aldeias mak hanesan Aldeia Levono, Irachau, Caporu no Puno.

B.     ANÁLIZA REZULTADU PESKIZA

            Iha análiza rezultadu peskiza ida ne’e peskizador atu deskreve konaba rezultadu peskiza ne’ebé durante hala’o peskiza iha Suku Pairara, Sub-distritu Lautém, Distritu Lautém. Nune’e mos atu deskreve papél lideransa lokal ba implementasaun dezenvolvimentu lokal, atu identifika mos fatóres ne’ebé fó obstaklu ba dezenvolvimentu lokal no Atu deskreve progresu ka susesu husi dezenvolvimentu lokal partikularmente iha Suku Pairara.

Suku hanesan autoridades komunitárius no laos parte husi administrasaun Sub-distritu, Governu sempre trata Suku sira hanesan autoridades komunitárius ne’ebé mak organiza sira nia komunidade hodi halo dezenvolvimentu iha sira nia Suku laran liu husi estrutura formal hanesan orgaun Governu liu husi Ministério Administrasaun Estatál e Ordenamentu Território ne’ebé kria lei no.3/2009 defini lideransa komunitáriu sira nu’udar pessoal koletiva atu organiza partisipasaun sidadaun hodi fó solusaun ba sira nia problema rasik no hala’o planu programa ne’ebé deside hamutuk ho komunidade.

Dekretu lei ne’e mos hateten katak lideransa lokal Chefe do Suku eleitu husi komunidade liu husi eleisaun geral ho liverdade no demokrasia. Depois de hetan direitu hanesan Chefe do Suku ka lideransa lokal, liu husi eleisaun geral no sei lidera komunidade iha Suku laran ho durasaun tempu tinan 6 (ne’en).

 Iha formatu ba organizasun Governasaun Suku Pairara, haktuir iha Konstituisaun ou Dekretu Lei nu. 5/2004 artigu 5 konaba regulamentu servisu ba organizasaun Governasaun Suku ho ninia estrutura mak hanesan:

Konsellu do  Suku

Chefe do Suku Acacio da Cruz

         ESTRUTURA SUKU PAIRARA

          

PAAS Rostina Mendes

 

Chefe Joventude F+M 1.  Sejantina H. Pinto 2.  Osvaldo Dos Santos

Rep. Feto Rua Domingas Pinto

Lia Nain Baltazar Oliveira Sampaio

                                                                                       

C.A Ira-Tchau Valentim M Vieira

C.A Levono Leodato Correia

C.A Caporu Ramiro da Gama

C.A Puno Antonio da Silva

 

Fontes: Suku Pairara, 20/04/2014

Konsellu suku maka nu’udar orgaun kolektivu no konsultivu husi Suku, ne’ebé ho intensaun atu ajuda no fó konsellu ba Chefe do Suku atu bele hala’o diak ninia funsaun, ninia servisu ba interese komunidade lokal sem limitasaun ba interese nasional. Konsellu do Suku kompostu husi Chefe do Suku, Chefe Aldeia iha aldeia ida-idak ne’ebé mak kompostu iha Suku ho ninia membru hanesan Representante feto rua, Juventude nain rua,tuir kada sexo, Ansiaun ka Ansia nain ida no Lia Nain ida.

1.        Papél Lideransa Lokal ba iha Dezenvolvimentu Suku

Bazeia ba dekreitu Lei no. 3/2009 katak lideransa lokal maka sai hanesan fatór determinante iha susesu dezenvolvimentu Suku, relasiona ho dekreitu lei ne’e, papél lideransa lokal importante tebes atu organiza no mobiliza komunidade no halo planu programa ba dezenvolvimentu Suku liu husi hasa’e kapasidade no kualidade rukursus humanus komunidade iha Suku laran.

Inisiativa ne’ebé diak husi lideransa lokal ho vizaun ne’ebé diak ba dezenvolvimentu Suku hodi hasa’e kualidade no kapasidade rekursus humanus komunidade iha Suku laran presiza servisu hamutuk ho Governo no ONG sira hodi fo kapasitasaun liu husi treinamentu no formasaun edukasaun iha Suku laran.

Relasiona ho kestaun refere, tuir mai bazeia rezultadu intervista ne’ebé realiza konaba papél lideransa lokal ba iha dezenvolvimentu Suku, tuir Acacio Da Cruz (Chefe do Suku) infórma katak:

“Nudar lider Komunitáriu nia papél mak organiza komunidade hodi halo aktividade físiku no nonfísiku bazeia ba orientasaun no regras ne’ebé iha liu husi desizaun Konsellu Suku ne’ebé deside hamutuk ho komunidade hodi halo planu programa ba dezenvolvimentu iha Suku Pairara, nune’e mos hato’o programa no proposta ba governo konaba problema ne’ebé povu infrenta, no sevisu hamutuk ho ONG sira liu husi treinamentu hodi hasa’e kapasidade no kualidade rekursus humanus iha Suku laran hodi fó apoio ba programa dezenvolvimentu Suku”[26].

Assuntu hanesan hato’o husi Valentim M. Vieira (Chefe Aldeia) iha intervista hateten katak:

“Ami hanesan lideransa lokal iha baze sempre hala’o ami nia papél bazeia ba regulamentu no desizaun ne’ebé ami deside hamutuk ho komunidade, koalia kona ba dezenvolvimentu Suku no moris diak komunidade nian, ami hanesan lideransa lokal sempre halo observasaun ba nessesidade ne’ebé komunidade sira infrenta no esfórsu a’an nafatin hodi resolve problema komunidade nian”[27].

Nune’e mos ho kestaun hanesan refórsa husi Ramiro da Gama (Chefe Aldeia) katak:

“Ami iha papél ne’ebé importante atu dezenvolve rasik ami nia Suku rasik, iha setor dezenvolvimentu fisiku ami hanesan komponente governo ne’ebé kiik liu, maibe ami iha espritu nafatin hodi organiza komunidade sira hala’o aktividade ne’ebé ami deside hamutuk ho komunidade”[28].

Relasiona ho assuntu iha leten ne’ebé hato’o husi informador sira nia hanoin, nu’udar peskizador iha área refere fó análiza katak lideransa lokal iha Suku Pairara iha interese bo’ot ba dezenvolvimentu Suku, iha mos ezizensia no nessesidade komunidade sai hanesan preokupasaun bo’ot ba lideransa lokal iha Suku laran durante exerce sira nia funsaun hanesan lider lokal, hanesan lideransa lokal ho espiritu ne’ebé diak atu hala’o aktividade loron-loron, bele konsidera sira iha lezitimidade durante ukun iha Suku laran.

Lideransa komunitáriu ho nia estrutura tomak sira iha duni papél importante ida hodi organiza no mobiliza komunidades atu hadi’a energia ne’ebé positivu husi komunidade nian iha Suku Pairara, sei persiza mos komitmentu no kompriensaun ne’ebé a’as atu halo komunidade ohin loron nian ne’ebé la hetan afeta hodi sai matadalan ba dezenvolvimentu  aban bainrua nian presiza iha planu estrategia ne’ebé klaru husi ema lideransa ne’ebé iha kbi’it maka’as atu lidera hodi halo planu ba dezenvolvimentu Suku.

2.        Progresu no Sussesu husi Implementasaun Programa Dezenvolvimentu.

Dezenvolvimentu hanesan prosesu mudansa ne’ebé signifikadu atu kompleta nessesidade no aspirasaun komunidade ne’ebé seidauk iha ba iha. Implementasaun programa dezenvolvimentu lokal hanesan prosesu mudansa sosial ne’ebé ho objetivu atu hasa’e kualidade liu-liu hadi’a kondisaun moris komunidade nian iha área rurais, implementasaun programa dezenvolvimentu fó benefisu diak no bele responde ka kompleta nessesidade komunidade nian.

Eletrisidade mak dalan ba krescimentu ekonómiku nasaun nian, nune’é elektrifikasaun rural sei lori benefísiu barak ba ita nia povo. Governo garante katak populasaun tomak, sei hetan asesu nebé diak ba elektrisidade, 24 horas por dia. Iha tinan 2012 governo fornese rede elétrika ba komunidade iha Suku Pairara ho 24 horas por dia ate agora.

Nune’e mos Be’e Mos ne’ebé populasaun Suku Pairara utiliza maka Be’e matan no sistema pompa solar ne’ebé Embaixada Japaun iha Timor Leste, fó orsamentu ho montante US$ 95,304 ba apoiu Organizasaun Naun Governamentál (ONG) Masino Foundation hodi insstala sistema pompa solar Be’e Mos hodi fasilita nessesidade komunidade iha Suku Pairara.

Fatór edukasaun no formasaun ho kualidade, presiza tebes hodi hadi'a oportunidades moris komunidade, no atu permite labarik sira bele konkretiza sira nia potensial nomós ba dezenvolvimentu sosial no ba krescimentu ekonómiku Timor-Leste nian. Haré husi nível edukasaun iha Suku Pairara iha mudansa tamba maioria komunidade fó apoio ba nia oan sira hodi kompete iha edukasaun.

Iha progresu seluk ne’ebé implementa ho susesu iha Suku Pairara mos hanesan Sede ba Juventude, Kampu Voley ball no uma Vulneravel hamutuk 14 ba faluk sira iha Suku laran. Kestaun refere akresenta husi Crispin Maria Barros (Komunidade) katak: “Progresu no susesu husi dezenvolvimentu ne’ebé implementa ona iha Suku Pairara mak; Elektrisidade, Be’e mos, Aumenta sala Escola Primária, Konstruksaun Eskola infantil, Sede Juventude, Kampu volley ball no Uma vulneravel hamutuk 14 ba faluk sira”[29].

Assuntu hanesan hato’o husi Sejantina Henriques Pinto (Juventude) Dezenvolvimentu ne’ebé implementa ona iha ita nia Suku laran mak:

“Elektrisidade, Be’e mos, Saneamentu, Sede Juventude, Aumenta sala Escola Primária, Kosntrusaun Eskola infantil, Sintina ba komunidade, Sede juventude, Kampu volley ball, Uma vulneravel hamutuk 14 ba faluk sira”[30].

Nune’e mos tuir Rojerio Dos Santos (Professor) nia haré katak susesu husi implementasaun ba programa dezenvolvimentu Suku Pairara mak:

“Elektrisidade, Be’e Mos (Air Bersih) implementasaun husi Guvernu local ba NGO Masino Fundation (Lokal) no suporta husi Komunidade Japaun liu Husi Embaxada Japaun iha Timor-Leste, iha parte seluk mos lider lokal no komunidade kolabora hamutuk NGO local no Internasional, hodi hari’i jardim Infantil ou taman Kanak-Kanak (TK) ba labarik tinan lima mai kraik hodi fo formasaun formal”[31]

Hanoin hanesan refórsa mos husi Rostina Mendes (PAAS) ne’ebé infórma katak:

“Implementasaun programa dezenvolvimentu ne’ebé susesu ona iha ita nia Suku laran mak Sede Suku, Elektrisidade, Be’e Mos, Konstrusaun Eskola Infantil, aumenta Sala Eskola Primária, Sede Juventude, Kampu Volley Ball no Uma Vulneravel hamutuk 14 ba faluk sira”[32].

Bazeia ba assuntu liu husi intervista ba infórmador sira nia hanoin iha leten nu’udar peskizador análiza katak susesu husi implementasaun programa dezenvolvimentu Suku iha duni progresu bo’ot no bele nessesita nessesidade komunidade iha Suku Pairara, maibe iha aspeitu balun ne’ebé komunidade Suku infrenta, tuir observasaun ne’ebé peskizador hala’o iha Suku refere iha parte edukasaun ne’ebé fo importansia ba estudante sira sei menus fasilidade ba iha prosesu aprendizagem por ezemplo hanesan kadeira, meja, livru ne’ebé menus sai hanesan difikuldade.

Nune’e mos komunidade Suku Pairara hamutuk uma kain 10 ne’ebé evakua ba parte leste Suku Parlamentu tamba hetan dezastre rai monu iha área refere, uma kain hamutuk 10 ne’e to’o agora seidauk assesu ba elektrisidade no Be’e mos, komunidade refere presija atensaun husi Autoridade Lokal no parte Governu atu foti mekanismu hodi rejolve sedu problema ne’ebé komunidade sira infrenta tamba kestaun ne’e mos parte husi planu prioridade Suku hodi dezenvolve seitor ida ne’e.

3.    Papél Lideransa Lokal ba Planu Estrategia Dezenvolvimentu Suku.

Dezenvolvimentu nu’udar asaun ida ne’ebé mak programadu no planeiadu hodi responde ba nessesidades komunidade nian liu husi implementasaun programa ne’ebé implementa iha nível Suku mak hanensan infraestrutura báziku hodi komplementa nessesidade bázikus komunidade iha área rurais liu husi lideransa Komunitáriu hamutuk ho juventude no komunidade emgeral.

Prosesu ou mekanisme ne’ebé lideransa lokal iha tuir kna’ar ne’ebé exerse atu representa Suku nian no mo’os atu lidera reuniaun sira ho konsellu do Suku ho didiak, independenti tuir nia funsaun servisu hodi deside planu estrategia ba dezenvolvimentu Suku hamutuk ho membru Konsellu Suku no estrutura lider Komunitáriu iha Suku laran.

Planu prioridade iha dezenvolvimentu Suku Pairara iha parte físiku maka; Saúde, essensial ba kualidade moris komunidade, tamba tuir Planu Estratégiku Sektor Saúde nian, ba 2011-2030, iha médio ho longo prazo sei buka dezenvolve rekursus humanus ne’ebé presiza atu nune’e Suku sira bele hetan médiku ida, enfermeiros rua, parteiras rua, tékniku laboratório ida ho tékniku Farmásia ida.

Edukasaun sai hanesan fatór ne’ebé importante ba dezenvolvimentu nasional tantu mos iha dezenvolvimentu lokal iha mundu globalizasaun ida ne’e, haré husi nível edukasaun iha Suku Pairara iha mudansa tamba maioria komunidade fó apoio ba nia oan sira hodi kompete iha edukasaun, maibe tuir observasaun ne’ebé peskizador hala’o iha Suku refere iha parte edukasaun menus fasilidade ba iha prosesu aprendizagem por ezemplo hanesan kadeira, meja, livru ne’ebé menus sai hanesan difikuldade.

Kondisaun estrada a’at ne’ebé liga husi Suku Maina I ba Suku Pairara liu-liu iha Aldeia Caporu, Ira-Tchau no Levono, ho kondisaun Estrada ladiak sai hanesan preokupasaun komunidade iha Suku laran.

Komunidade maioria hetan assesu ba Be’e mos iha Suku laran, maibe uma kain 10 ne’ebé evakua ba parte Leste Suku Parlamentu ne’ebé hetan dezastre rai monu iha área refere, uma kain hamutuk 10 to’o agora seidauk assesu ba elektrisidade no Be’e mos no ida ne’e hanesan kestaun ne’ebé sai planu prioridade hodi dezenvolve seitor ida ne’e. Assuntu iha leten Acacio Da Cruz (Chefe do Suku) infórma katak:

“Nu’udar lider lokal iha obrigatório tenki halo aprosimasaun ho governo, parseiro no intituisaun hotu-hotu, liu-liu governo lokal administrasaun sub-distritu hodi halo kondenasaun no halo planu ba dezenvolvimentu Suku. Planu ne’ebé ami halo hanesan ezijensia husi komunidade hodi dezenvolve Suku Pairara, iha parte físiku nian maka Súde, Edukasaun, Be’e mos, Estrada no Elektrisidade no Infrastrutura seluk”[33].

Assuntu hanesan tuir Leodato Correia (Chefe Aldeia) infórma katak:  

“Nu’udar lideransa lokal iha Suku Pairara ami iha Vizaun no planu ne’ebé planeia hamutuk ba dezenvolvimentu iha Suku laran, liu-liu atu rezolve problema no aspirasaun komunidade nian, planu prioridade ne’ebé lideransa lokal planu hamutuk ho komunidade iha Suku mak Saúde, Edukasaun, Be’e mos, Estrada no Elektrisidade”[34].

Iha parte seluk nu’udar joven no jerasaun fóun ba futuru ne’ebé kestiona liu ba implementasaun dezenvolvimentu Suku, Armenio Ze Choro (Juventude) hateten

“Lideransa lokal iha Suku Pairara iha planu programa implementasaun barak ne’ebé sira defini no hato’o ba governo hodi dezenvolve moris komunidade, maibe sei iha prosesu laran no seidauk iha implementa ba programa refere, nu’udar  juventude iha Suku ida ne’e ami sempre kolabora hamutuk ho lider lokal sira ho hanoin ida deit hodi dezenvolve ami nia Suku[35].

Bazeia ba rezulta intervista liga ba argumentu sira ne’ebé iha leten mak hakerek nain análiza katak, lideransa lokal iha interese bo’ot ba nia komunidade iha Suku laran hodi halo planu ba implementasaun hodi dezenvolve sira nia Suku, dezenvolvimentu hanesan prosesu ida ne’ebé dinámiku tuir mudansa globalizasaun ohin loron nian tamba ne’e objetivu husi dezenvolvimentu mak responde nessesidade infraestrutura básiku komunidade iha base.

Saude hanesan planu prioridade Suku, maibe realidade ne’ebé hatudu jeralmente kondisaun saúde populasaun Suku Pairara difisil liu wainhira atu asesu ba Saúde públiku tamba iha Suku laran laiha klínika, tamba ne’e komunidade sira tenki lao ho distânsia ne’ebé do’ok kuaze km 4 husi Suku laran ba sentru Saúde Sub-distritu Lautém. Espera katak iha durante mandatu Lider lokal sira bele aselera planu programa ne’e hodi nesesita nessesidade kounidade iha Suku Pairara.

Dezenvolvimentu mak fó garante ba komunidade hodi kompete no aplika nia kapasidade no habilidade ne’ebé mak sira iha, termu ida ne’e dala barak juventude sira uja hodi responde ba iha situasaun mudansa mundu ohin loron nian, no iha parte seluk involvimentu no Partisipasaun juventude iha dezenvolvimentu Suku siginifikante tebes ba progresu Suku ne’e rasik.

4.        Funsaun no Responsabilidade Lideransa Komunitáriu.

Atu hala’o servisu ho efektivo no efisênsia, funsaun no responsabilidade Papél Lideransa Lokal, tenki fó kontribusaun ideias ne’ebé profunda hodi motivu prosesu sustentabilidade ba denvolvimentu iha nível Suku, assaun ne’ebé motiva lideransa lokal maka oinsa lideransa tenki iha kriterias adekuadu para bele motivu komunidade ba objetivu ne’ebé diak.

Kestaun refere tuir informador Acacio Da Cruz (Chefe do Suku) infórma:

“Funsaun lideransa komunitáriu maka dezenvolvimentu Suku, stabilidade, siguransa, paz iha Suku laran no prevene konflitu liu husi violênsia doméstika, Kna’ar seluk mak halo planeamentu, implementasaun programa no monitorizasaun ba programa ne’ebé hala’o iha Suku laran”[36].

Assuntu hanesan hato’o mos husi informador Osvaldo dos Santos (Chefe Juventude) katak:  

“Ami iha responsabilidade ne’ebé importante hodi halo planu ka programa ba dezenvolvimentu iha Suku laran, tamba ne’e ami sempre hamutuk ho komunidade no juventude hotu-hotu hodi kria stabilidade, unidade no seguransa iha ami nia Suku laran, hodi atinzi progresso dezenvolvimentu iha ami nia Suku, liu husi programa Governu ka planu Guvernu iha Nasaun demokrátika ida ne’e[37].

Kestaun hanesan hatutan husi João Lety da Asuncao (Funsionário Públiku) iha intervista hateten: tuir Nia haré

“Funsaun no responsabilidade lideransa Komunitáriu ba komunidade iha Suku Pairara, bele dehan katak sira iha responsabilidade máximu tamba na realidade iha duni progressu ba dezenvolvimentu Suku no iha duni implementasaun programa dezenvolvimentu Suku[38].

Bazeia ba hanoin sira iha leten nu’udar peskizador análiza katak, mudansa iha Suku laran sei lalao, karik sei laiha apoiu husi entidades sira liu-liu lideransa Komunitáriu nomós komunidade emgeral. responsabilidade no Papél Lideransa Lokal bazeia ba Dekretu Lei no. 3/2009 hodi koordena implementasaun hodi foti desijaun husi Konsellu do Suku no halo koordenasaun ho membrus Konsellu do Suku sira seluk, promove prosesu konsultasaun no diskusaun ne’ebé kontinua nafatin iha komunidade hotu konaba planeamentu no ezekusaun ba programa dezenvolvimentu Komunitáriu. Tamba ne’e responsabilidade Lideransa Komunitáriu tenki iha hanoin ka argumentu ne’ebé krítiku no konstruktivu atu nune’e bele responde nessesidade no aspirasaun komunidade hodi aselera ba prosesu dezenvolvimentu.

Atu krontribui ba dezenvolvimentu Suku liu husi estabilidade, unidade no siguransa ne’ebé máximu maka prosesu dezenvolvimentu sei fó benefisiu ba komunidade iha Suku, hodi bele responde aspirasaun no nessesidade komunidade ho responsabilidade máximu.

5.        Papél Lideransa Komunitáriu hodi Kontrola Komunidade.

Bazeia ba informasaun ne’ebé mak peskizador hetan iha báse hatudu katak Papél Lideransa Komunitáriu hodi kontrola komunidade hodi kontribui ba iha prosesu dezenvolvimentu Suku hatudu impaktu positivu tebes, tamba Papél ne’ebé sira exerse durante mandatu servisu, sempre iha kontrolamentu ba komunidade iha Suku nia laran, liu-liu monitoriza implementasaun programa dezenvolvimentu Suku no bele responde nessesidade no rozolve problema sosial ne’ebé komunidade sira infrenta. Husi kestaun iha leten tuir infórmador Acacio Da Cruz (Chefe do Suku) hateten:

“Sempre kontrola no halo monitorizasaun iha Suku laran liu-liu implemetasaun dezenvolvimentu físiku iha Suku laran, problema sosial ne’ebé mosu iha komunidade nia le’et hanesan konflitu ne’ebé mosu iha Suku laran nudar lider iha responsabilidade hodi halo aprosimasaun no buka mekanisme hodi rezolve tuir kultura ne’ebé eziste iha Suku laran”[39].

Hanoin hanesan realsa husi Elpidus Maia Mendes (Juventude) hateten katak;  

“Lideransa Komunitáriu iha Suku sempre iha kontrolo ne’ebé diak ba iha prosesu dezenvolvimentu Suku, aleinde fó apoio moral ba nia komunidade hodi hadook a’an husi violênsia no fó edukasaun moral liu husi enkontru husi komunidade no juventude tomak iha Suku laran”[40].

Hanoin refere hafórsa husi infórmador Leopoldo Gustavo (Juventude) fo nia argumentu katak:

“Kontrolamento lideransa komunitário ba nia komunidade no ba prosesu dezenvolvimentu Suku Pairara sempre hala’o nafatin, maibe dala ruma mos falta de konsiênsia husi Komunidade ne’ebé atu komprende lolos saida mak sira sei halo iha Suku Pairara nia laran”[41].

Bazeia ba rezultadu intervista iha leten, nu’udar peskizador halo análiza katak nu’udar komunidade hanesan ema humanu ka kualker grupu sei la lao mesak hodi hala’o aktividade ne’ebé mak iha ligasaun ho dezenvolvimentu Suku tamba planu no aktividade ruma atu lao diak presiza tebes kontribuisaun husi entidades hotu liu-liu Lideransa Lokal no komunidade emgeral ne’ebé mak pertense iha laran atu nune’e bele fó progressu no benefisiu ba komunidade nomós ba nasaun demokrátiku ida ne’e.

6.    Dezenvolvimentu Infra-estrutura.

Atu dezenvolve ita nia Nasaun, atu harí Ekonómia ne’ebé moderna no produtiva no atu kria empregu, presiza konstrói infra-estruturas bázikas no produtivas. Haré ba ita nia nessesidades, eskala (ka dimensaun) infra-estruturas nian no nia kustus sei bo’ot teb-tebes, tamba ne’é maka, tenki planeia ho diak programa ida ne’é atu bele implementa, ho hanoin no sukat ne’ebé realístiku.

Relasiona ho kestaun iha leten kona ba dezenvolvimentu infra-estrutura iha Suku Pairara laran, refere ba sektór privadu no públiku ne’ebé halo konstrusaun iha komunidade. Infrastrutura ne’ebé kestiona ida ne’e inklui assesu kondisaun ne’ebé la diak, hanesan: estrada, ponte, barreira, kanál, inundasaun, elektrisidade no infrastrutura seluk tan.

Dezenvolvimentu infra-estrutura ne’ebé komunidade kestiona liu maka kondisaun Estrada ne’ebé liga husi Suku Maina I ba Suku Pairara ne’ebé a’at total desde independênsia Timor-Leste to’o agora sai hanesan preokupasaun ba komunidade, ezijensia komunidade atu rehabilita Estrada, tamba Estrada mak sei sai hanesan ligasoens importantes ba transportes.

Kestaun iha leten tuir Leopoldo Gustavo (Juventude) infórma katak:

“Dezenvolvimentu infra-estrutura iha Suku Pairara balun lao ho susesu no bele fó benefisiu ba komunidade iha Suku laran, maibe infra-estrutura seluk ne’ebé sai hanesan preokupasaun komunidade Suku mak Estrada ne’ebé liga husi Suku Maina I ba Suku Pairara a’at total”[42].

Assuntu hanesan hato’o mos husi infórmador Marito Teles (Komunidade) ne’ebé infórma katak:

“Dezenvolvimentu infra-estrutura iha Suku Pairara balun lao ho susesu, maibe infra-estrutura balun ladun iha mudansa hanesan estrada ne’ebé seidauk hadia desde ukun a’an no iha parte edukasaun hanesan eskola ne’ebé ho kondisaun ladiak no menus fasilidade iha prosesu aprendizagem”[43].

Problemas infra-estrutura liu-liu Estrada ne’ebé a’at iha Suku Pairara, tuir Osvaldo dos Santos (Chefe Juventude) refórsa liu tan katak

“Infrastrutura iha ami nia Suku Pairara, durante ukun rasik-an iha tinan barak ona iha Nasaun Timor-Leste ida ne’e, dezenvolvimentu infra-estrutura liu-liu Estrada a’at total no ida ne’e sai hanesan preokupasaun komunidade iha Suku Pairara”[44]

Bazeia ba hanoin sira iha leten nu’udar peskizador fó rezumu katak maske dezenvolvimentu infra-estrutura balun lao ona iha Suku Pairara no bele fó benefisiu ba komunidade sira, maibe komunidade lamenta teb-tebes ho kondisaun Estrada a’at ne’ebé liga husi Suku Maina I ba Suku Pairara liu-liu iha Aldeia Caporu, Ira-Tchau no Levono, ho kondisaun Estrada ladiak sai hanesan preokupasaun komunidade iha Suku laran.

Alende iha parte edukasaun hanesan eskola ne’ebé ho kondisaun ladiak no menus fasilidade iha prosesu aprendizagem hanesan kadeira, meja, livru no seluk tan ne’ebé sai hanesan kestaun ba estudante sira atu assesu ba edukasaun.

7.    Responsabilidade Komunidade ba Planu Implementasaun Programa Dezenvolvimentu.

Iha nasaun hanesan Timor-Leste komunidade nia ezistensia no nia papél importante tebes ba iha prosesu dezenvolvimentu nasional hanesan ita hotu hatene katak, durante luta ba independênsia komunidade no juventude barak mak sakrifika nia an ba prosesu ukun-an ida ne’e tamba ne’e nu’udar  jerasaun foun nia papél importante mak nu’udar ajenti kontrolu social nomós nu’udar transformador ba iha sosiedade iha Suku nia laran.

Haré husi responsabilidade komunidade ba implementasaun programa dezenvolvimentu Suku Pairara bele dehan iha kooperasaun diak entre komunidade ho lideransa lokal no juventude tomak hodi aselera programa ne’ebé sira planu hamutuk tantu mos planu governo nian. Husi assuntu refere tuir João Lety da Asunção (Funsionáriu Públiku) informa katak:

“Wainhira iha planu programa implementasaun ba dezenvolvimentu iha Suku Pairara lideransa Komunitáriu ho komunidade no joventude sira sempre iha responsabilidade no kooperasaun diak ba implementasaun programa iha Suku laran[45]

Assuntu hanesan hatutan husi Osvaldo dos Santos (Chefe Juventude) informa katak: “komunidade iha Suku laran sempre iha responsabilidade no iha kooperasaun diak ho lideransa lokal no hakarak kontribui ba dezenvolvimentu Suku ne’ebé fo benefisiu ba komunidade”[46].

Hanoin hanesan reforsa tan husi Alcino Porto Ferreira (komunidade) tuir nia haré katak :  

“Komunidade iha Suku Pairara iha duni responsabilidade ba implementasaun programa dezenvolvimentu Suku, tamba durante programa saida deit mak iha Suku laran komunidade sira sempre iha kooperasaun diak ho lideransa lokal sira hodi aselera programa dezenvolvimentu iha Suku laran[47].

Bazeia ba hanoin sira iha leten nudar peskizador bele halo análiza katak atu atinji objetivu husi dezenvolvimentu no aselera implementasaun programa dezenvolvimentu Suku, presiza iha resposabilidade, kontribusaun komunidade no koolaborasaun diak ho entidades tomak liu-liu lideransa lokal hodi atinji objetivu final husi dezenvolvimentu rasik.

8.        Regulamentu ne’ebé regula iha Suku Pairara.

Durante ne’e Suku Pairara seidauk iha lei ruma ne’ebé Suku ne’e implementa, maibe sira tenta halo sosializasaun iha Suku hodi implementa regulamentu tradisional ne’ebé eziste hanesan tara-bandu.Tara-bandu nu’udar kustumariu tradisionál Timor-Leste ne’ebé obrigatóriu atu fasilita pás no rekonsiliasaun liu husi podér konkordansia komúm husi komunidade hanesan símbolu lulik ruma ne’ebé iha espiritu supranaturál reprezenta ema, familia ka komunidade ida iha fatin ida ka barak, reprezenta sasan natureza hodi bandu ba hahalok ka assaun ema, familia ka grupu iha sosiedade refere ba violênsia konflitu (fíziku/nonfíziku).

Nune’e mós tara-bandu bele fó kontrolu moris seres umana, balada no meiu ambiente (biodiversidade) no mós sasan selu-seluk husi kriatura Maromak nian husi ameasa estraga kauzadu sira tamba rezultadu husi hahalok umana ne’ebé la hatudu responsável. Kestaun iha refere kona ba tara-bandu ne’ebé sai hanesan regulamentu ka lei ne’ebé regula iha Suku Pairara tuir Acacio Da Cruz (Chefe do Suku) hateten katak:

“Regulamentu ne’ebé regula iha Suku laran liu husi cultura ne’ebé eziste iha Suku laran hanesan Tara bandu, komunidade dala ruma lahalo tuir, tamba nessesidade privado maka sei obriga, tuir lolos regulamentu ne’ebé  regula tenki respeita no halo tuir hodi evita situasaun kondisaun real ne’ebé mosu”[48].

Asuntu hanesasn hato’o husi João Lety da Assunção (funsionáriu Públiku) katak:

“Regulamentu ne’ebé lider Suku no komunidade regula hamutuk hanesan tara bandu iha kategória tolu hanesan regulamentu relasaun entre ema ho ema, regulamentu relasaun entre ema ho animál no regulamentu relasaun entre ema ho meiu ambiente, maibe realidade ne’ebé iha Komunidade dala ruma la kompri no sai hanesan buat ida ne’ebé laiha fólin (valor)”[49]

Nune’e mos tuir Leopoldo Gustavo (Juventude) reforsa liu tan katak:

“Regulamentu ne’ebé regula iha Suku Pairara liu husi tradisaun Suku nian hanesan tara bandu, ho objetivu atu evita problema sosial ka konflitu ruma iha Suku, dala barak komunidade la halo tuir tamba konsiênsia husi Komunidade mak sei mínimu hodi tuir regulamentu ne’ebé iha”[50].

Bezeia ba rezultadu peskiza hatudu katak relasaun tara-bandu ne’ebé dezenvolve no kria lei tradisionál iha realidade moris lor-loron. Husi lei ne’e mak bele kompleta no kria ambiente ba sosiedade ida atu iha assesu diak ba justisa, depende situasaun konflitu ne’ebé akontese Komunidade ne’e iha ona assesu ba justisa, klaru problema ki’ik ka bo’ot iha possivel bele rezolve lalais lalevanta to’o tribunál hosi minimiza risku konflitu. Tamba ne’e tara-bandu ne’e diak no bele kria harmonizasaun sosiál, nune’e mós ho lei tradisionál hirak ne’e ema ka familia atu halo tuir no mós bele fó oportunidade ba sidadaun ka sosiedade atu iha konsiénsia a’as no haburas valores justisa tradisionál iha nasaun ida ne’e.

Husi rejultado intervista nu’udar peskizador halo análiza katak komunidade presija iha sosializasaun ka formasaun ba komunidade sira oinsa atu kompreende kontekstu no definisaun kona ba tara-bandu ne’ebé sai hanesan regulamentu ka lei Suku nian.

9.        Obstaklu ba Dezenvolvimentu iha Suku Pairara.

Hanesan ita hotu hatene katak dezenvolvimentu lokal liu-liu iha áreas rurais maka infra-estruktura bázika hanesan estrada, be’e mos, ponte, bareira no seluk tan hanesan seitores ne’ebé mak importante no prioritariu tebes ba moris komunidade sira ne’ebé mak hela iha área rurais. Wainhira kestaun sira ne’e mak seidauk rezolve, maka sai hanesan obstaklu bo’ot ba dezenvolvimentu nasional no dezenvolvimentu lokal.

Rekursu humanus hanesan fatór determinante iha prosesu implementasaun ba dezenvolvimentu nasional tantu iha dezenvolvimentu Suku, husi fatór ida ne’e hanesan obstaklu bo’ot ba iha Suku Pairara liu-liu menus kapasidade no abilidade lideransa lokal no komunidade hodi prosesu planu stratégia dezenvolvimentu iha Suku laran.

Kestaun iha leten ne’e sai hanesan obstaklu ba dezenvolvimentu iha Suku Pairara. Tuir Acacio Da Cruz (Chefe do Suku) hateten katak “faktor ne’ebé sai hanesan obstaklu ba dezenvolvimetu iha Suku Pairara mak komunidade laiha interese no laiha pasiênsia, Komunidade laiha responsavel, Atetude barukten no Moris dependênsia”[51]

Husi kestaun refere tuir informador Floriano Maia (Professor) akresenta katak:

“Faktor ne’ebé sai hanesan obstaklu ba dezenvolvimetu iha Suku Pairara mak komunidade laiha interese no laiha pasiênsia atu dezenvolve sira nia a’an, iha fatór seluk mos sai hanesan dezafiu mak menus rekursus humanus komunidade Suku Pairara liu-liu lider lokal sira oinsa atu jere dezenvolvimentu Suku”[52].

Hanoin hanesan tuir Marito Teles (Komunidade) infórma katak:

“Fatór ne’ebé sai hanesan obstaklu ba dezenvolvimentu iha Suku Pairara mak hanesan kolaborasaun servisu hamutuk komunidade ho lideransa Komunitáriu lamaximu, konsiênsia komunidade atu involve-an iha dezenvolvimentu Suku ladun máximu  no menus partisipasaun juventude ba dezenvolvimentu Suku”[53].

Assuntu hanesan hatutan husi Ervin Jonio Carvalho Sequeira (Juventude) infórma katak:

“Faktor ne’ebé fó obstaklu ba dezenvolvimentu iha Suku Pairara maka; menus rekursus humanus komunidade iha Suku Pairara, menus kapasidade husi lideransa lokal iha área Administrasaun ba dezenvolvimentu Suku, no kooperasaun komunidade ho lideransa lokal  mínimu liu”[54].

Bazeia ba hanoin sira iha leten, hakerek na’in fó rezumu dezenvolvimentu atu lao susesu iha Suku laran presiza kooperasaun ou servisu hamutuk no involvimentu husi komunidade no Lideransa Komunitáriu ne’ebé direta ka indireta, hanesan juventude nu’udar jerasaun foun importante tebes hodi involve sira atu nune’e juventude bele sente katak dezenvolvimentu ne’e na’in mak sira. Tamba ne’e presiza fó kapasitasaun no treinamentu ne’ebé mak bele loke komunidade no juventude sira nia neon atu bele kompete iha dezenvolvimentu iha nasaun foun ida ne’e.

Involvimentu ka partisipasaun komunidade no juventude hodi koopera ho lideransa lokal iha programa dezenvolvimentu Suku Pairara importante tebes tamba hanesan juventude sira mak na’in ba iha prosesu dezenvolvimentu ne’ebé mak tama mai iha Suku, maibé involvimentu no partisipasaun komunidade no juventude iha dezenvolvimentu la máximu sei lalori benefisiu ba dezenvolvimentu Suku. Relasiona ho kestaun ida ne’e bele dehan katak, nu’udar jerasaun foun importante tebes ba nasaun joven ida ne’e, liu-liu husi Suku Pairara importante tebes juventude sira nia komitmentu no organiza aktividade hodi partisipa no involve iha prosesu ne’ebé nia relasaun ho dezenvolvimentu liu-liu ba dezenvolvimentu Suku.

KAPÍTULU V

KONSIDERASAUN FINAL

5.1         Konkluzaun

Antes atu konklui análiza konaba rezultadu peskiza ne’ebé formula ona, tuir rezultadu peskiza no análiza dadus iha kapítulu sira dahuluk konaba Papél Lideransa Lokal iha Dezenvolvimentu Komunitáriu iha Suku Pairara, ho ida ne’e mak hakerek na’in halo konkluzaun hanesan tuir mai;

1.      Papél Lideransa Lokal ba Dezenvolvimentu Suku Pairara lao diak tebes maske sei infrenta defikuldades hanesan menus kapasidade lideransa lokal iha área Administrasaun ne’ebé dalaruma fó impaktu negativu ba dezenvolvimentu Suku Pairara.

2.      Polítika Lideransa Lokal ba Dezenvolvimentu iha Suku Pairara fó progresu ba komunidade emgeral tamba, komunidade sempre iha komitmentu ida ne’ebé diak hodi koopera hamutuk Lideransa Komunitáriu iha Suku atu fó benefisiu ba moris diak.

3.      Fatór sosial-ekonómia hanesan fatór ida ne’ebé determinante no fó kontribuisaun maka’as tebes ba iha prosesu dezenvolvimentu Suku, sosio-ekonómia ne’e mós objetivu atu hadi’a moris ne’ebé sufisiente hodi sustenta ou suporta ba seitor sira seluk hanesan edukasaun. Bele dehan katak iha problema sosial barak mak mosu iha komunidade nia le’et tamba nessesidade komunidade ne’ebe la atinji.

4.      Tenki hakbiit no motiva komunidade liu husi kria aktividade ne’ebé fó espritu patriotismu no nasionalismu hodi ativu no partisipativu iha dezenvolvimentu lokal iha Suku Pairara.

5.2       Rekomendasaun

 Iha página ida ne’e, hakerek na’in sei rekomenda ba iha Governu no Lideransa Komunitáriu Suku Pairara, relasiona ho papél Lideransa Lokal iha Dezenvolvimentu Komunitáriu , mak hanesan tuir mai ne’e:

1.      Ami espera ba oin Lideransa Lokal Suku tenki servisu efisiênsia no efikasia iha prosesu dezenvolvimentu Suku Pairara, tuir papél ne’ebé sira exerse.

2.      Lideransa lokal iha Suku Pairara Presiza tebes ajuda no hetan kapasitasaun no treinamentu hodi aumenta juventude feto no mane nia kapasidade hodi hala’o dezenvolvimentu Suku nian liu-liu iha área hasa’e rekursu humanu.

3.      Komunidade hein katak lideransa Komunitáriu sira tenki toma atensaun máximu konaba prosesu dezenvolvimentu lokal iha Suku Pairara ne’ebé, liga ba fatór sosial, edukasaun no ekonómia, tamba fatór tolu ne’e fó kontribuisaun maka’as mós ba iha prosesu dezenvolvimentu Suku hodi atinji moris diak.

4.      Espera katak Governu lokal no Lideransa Komunitáriu bele hamósu planu no estrategia ida diak ba komunidade hodi suporta no kontribui prosesu dezenvolvimentu iha Suku Pairara.

5.      Governu no Lideransa Komunitáriu sira tenki kria mós treinamentu hodi hasa’e kuiñesimentu no kapasidade komunidade iha área dezenvolvimentu iha Suku Pairara.

6.      Hametin polítika no fortifika liña kordenasaun no komunikasaun entre lideransa governu lokal, lider Komunitáriu ho komunidade no juventude hodi nune’e bele dezenvolve programa dezenvolvimentu lokal iha Suku Pairara.

BIBLIOGRAFIA

1.      Fontes Deputadu, Inacio Moreira husi Bankada Oposisaun Fretilin (Timornewsline, 12 Outubru 2011)

2.      Dewi S. Baharata, kamus umum Bahasa Indonesia, Jakarta 1983,hal.375

3.      Paul B. Harton dkk, Sosiologi, jilit I, edisi ke VI, Erlanga, Jakarta Indonesia, 1991.hal,118

4.      Thibaut dan Kelly. Perilaku Organisasi, sinar baru, Bandung, 1986, hal 131

5.      Henry Pratt Fairchaild, 1960, hal, 174 dalam Kartini Kartono, pemimpin dan kepeminpinan, Jakarta, Raja Grafindo Persada, 2006, hal, 38

6.      Winardi SE, Kepemimpinan Dalam Managemen, Rineka Cipta, Jakarta Indonesia, 1990, Hal, 32.

7.      Kepemimpinan-Fisipuh.Blogspot.Com/2009/03/Definisi-Pemimpin. Html, diakses pada tanggal 20 Februari 2014.

8.      Materi Diskusi Ilmiah IPDN pada Tanggal 11 Maret 2008, Oleh: Prof. Dr. H. I. Nyoman Sumaryadi, Drs. M. Si, Guru Besar IPDN

9.      Dekreitu Lei Ministerial Administrasaun Estatál, no. 3/2009, Konaba Lideransa Komunitáriu

10.  Dekreitu Lei Ministerial Administrasaun Estatál, no. 3/2009, Artigo 2, Konaba Defenisaun Lideransa Komunitáriu

11.  Dekreitu Lei Ministerial Administrasaun Estatál, no. 3/2009, Artigo 5, Konaba Konsellu do Suku

12.  Dekreitu Lei Ministerial Administrasaun Estatál, no. 3/2009, Artigo 10, Konaba Área Aktividade.

13.  Dekreitu Lei Ministerial Administrasaun Estatál, no. 3/2009, Artigo 11 Konaba Kompetênsia Chefe do Suku

14.  Dekreitu Lei Ministerial Administrasaun Estatál, no. 3/2009, Artigo 12, Konaba Kompetênsia Konsellu do Suku

15.  Dekreitu Lei Ministerial Administrasaun Estatál, no. 3/2009, Artigo 13, Konaba Funsionamentu Konsellu do Suku.

16.  Dekreitu Lei Ministerial Administrasaun Estatál, no. 3/2009, Artigo 14 Konaba Kompetênsia Chefe Aldeia

17.  P. Jansen, Tekni-Teknik Pengembangan Masyarakat, PT, Grafindo Ekspres, Bandung 1995, hal, 79.

18.  Agushoa Kasmat, Pembangunan Desa dan Desa Terpadu, Rineka Cipta, Jakarta 1985, hal 24

19.  T.R.Batten, Comonities and Their development dalam A Suryadi, Radja Grafindo, Bandung1989,hal104

20.  P. Janssen, Teknik-Teknik Pembanguna Masyarakat Desa, Institut Pembangunan Masyarakat, Malang, 1970, hal234.

21.  Koentjaraningrat (1997),“Sosiologi Pembangunan dan Keterbelakangan Sosiologi”. Jakarta: Yayasan Ilmu-Ilmu Sosial

22.  Rogers 1983 “Why the Concern with Ways of Life”, GDIP Project, Oslo: United Nation University.

23.  Inayatullah, 1967, “Introduction to the Sociology of Development”. Cambridge: Macmillan.

24.  R.Linton, ahli antropologi.blogspot.com/2009/03/definisi-masyarakat. html, diakses pada tanggal 20 Februari 2014.

25.  http://ssbelajar.blogspot.com/2013/06/pengertian-masyarakat-menurut-para-ahli. html, diakses pada tanggal 20 Februari 2014

26.  http://google, selo sumarjan.blogspot.com/2009/03/definisi-masyarakat. html, diakses pada tanggal 20 Februari 2014

27.  Igusti Ngaruh Agun Metode penelitian sosial, PT, Gramedia Pustaka Utama Jakarta 1992, hal 13

28.  Fontes foti tutan husi (Eki Purwanto) Moleong, Lexy, J. 2000. Metode Penelitian Kualitatif, Bandung, Penerbit Remaja Rosdakarya. Pag.06.

---

[1] Fontes Deputadu, Inacio Moreira husi bankada oposisaun Fretilin (Timornewsline, 12 Outubru 2011)

[2] Dekreitu lei no.3/2009 Ministeriu Administrasaun Estatal.

[3]Dewi S. Baharata, kamus umum bahasa indonsia, Jakarta 1983,hal.375

[4]Paul B. Harton dkk, sosiologi, jilit I, edisi ke VI, Erlanga, Jakarta Indonesia, 1991.hal,118

[5]Thibaut dan Kelly. Perilaku organisasi, sinar baru, bandung, 1986, hal 131

[6]Ibid, hal 128

[7]Henry Pratt Fairchaild,1960,hal,174 dalam kartini Kartono, pemimpin dan kepeminpinan, Jakarta, Raja Grafindo Persada, 2006,hal,38

[8]Winardi SE, Kepemimpinan Dalam Managemen, Rineka Cipta, Jakarta Indonesia, 1990, Hal,32.

[9]http://kepemimpinan-fisipuh.blogspot.com/2009/03/definisi-pemimpin.html, diakses pada tanggal 20 Februari 2014.

[10]Materi Diskusi Ilmiah IPDN pada Tanggal 11 Maret 2008, Oleh : Prof.DR. H. I. NYOMAN SUMARYADI, Drs., M.Si, GURU BESAR IPDN

[11] Dekreitu lei ministerial administrasaun estatal, no. 3/2009,artigo 2, kona ba defenisaun lideransa komunitaria

[12] Ordway Tead, Dasar-Dasar Administrasi, (Penerbit Gajah Mada University Press), 2006, hal 12.

[13] Ralp M. Stogdill, Ibid, hal 13.

[14]P. Jansen, tekni-teknik pengembangan masyarakat,PT,Grafindo Ekspres,bandung 1995,hal,79.

[15]Agushoa Kasmat, pembangunan desa dan desa terpadu, Rineka Cipta,Jakarta 1985,hal24

[16]T.R.Batten,Comonities and Their development dalam A Suryadi, Radja Grafindo, Bandung1989,hal104

[17]P. Janssen, teknik-teknik pembanguna masyarakat desa, Institut Pembangunan Masyarakat, Malang, 1970, hal234.

[18]Koentjaraningrat (1997),“Sosiologi Pembangunan dan Keterbelakangan Sosiologi”. Jakarta: Yayasan Ilmu-Ilmu Sosial

[19]Rogers 1983 “Why the Concern with Ways of Life”, GDIP Project, Oslo: United Nation University.

[20]Inayatullah, 1967, “Introduction to the Sociology of Development”. Cambridge: Macmillan.

[21]http://R.Linton, ahli antropologi.blogspot.com/2009/03/definisi-masyarakat.html,diakses pada tanggal 20 Februari 2014.

[22] http://ssbelajar.blogspot.com/2013/06/pengertian-masyarakat-menurut-para-ahli.html.

[23]http://google, selo sumarjan.blogspot.com/2009/03/definisi-masyarakat.html,diakses pada tanggal 20 Februari 2014.

[24] Igusti Ngaruh Agun Metode penelitian sosial, PT, Gramedia Pustaka Utama Jakarta 1992, hal 13

[25]Fontes foti tutan husi (Eki Purwanto) Moleong, Lexy, J. 2000. Metode Penelitian Kualitatif, Bandung, Penerbit Remaja Rosdakarya. Pag.06.

[26]Rezultadu Intervista Acacio Da Cruz (Xefe do Suku) (20.04.2014)

[27]Rezultadu Itervista Valentim M. Vieira (Xefe Aldeia) (25.04.2014)

[28]Rezultadu Itervista Ramiro da Gama (Xefe Aldeia) (23.04.2014)

[29] Rezultadu intervista Crispin Maria Baros (Komunidade)(30.04.2014)

[30] Rezultadu intervista Sejantina Henriques Pinto (Juventude)(23.04.2014)

[31] Rezultadu intervista Rojerio D C (prof.) (02.05.2014)

[32] Rezultadu intervista Rostina Mendes (PAAS)(20.04.2014)

[33] Rezultadu intervista Acacio Da Cruz (Xefe do Suku)(20.04.2014)

[34] Rezultadu intervista Leodato Correia (Xefe Aldeia)(25.04.2014)

[35]Rezultadu intervista Armenio Ze Choro (Juventude)(27.04.2014)

[36]Rezultadu Intervista Acacio Da Cruz (Xefe do Suku)(20.04.2014)

[37]Rezultadu Intervista Osvaldo dos Santos (Xefe Juventude)(21.04.2014)

[38]Rezultadu Intervista João Lety da Assunção (Funsionario Publiku)(22.04.2014)

[39] Rezultadu intervista Acacio Da Cruz (Xefe do Suku)(20.04.2014)

[40] Rezultadu intervista Elpidus Maia Mendes (Juventude)(26.04.2014)

[41] Rezultadu intervista Leopoldo Gustavo (Juventude)(26.04.2014)

[42]Rezultadu Intervista Leopoldo Gustavo (Juventude)(26.04.2014)

[43]Rezultadu Intervista Marito Teles (Komunidade)(22.04.2014)

[44] Rezultadu Intervista Osvaldo dos Santos (Xefe Juventude)(21.04.2014)

[45]Rezultadu Intervista João Lety da Assunção (Funsionariu Publiku)(22.04.2014)

[46] Rezultadu Intervista Osvaldo dos Santos (Xefe Juventude)(21.04.2014)

[47]Rezultadu Intervista Alcino Porto Ferreira (komunidade)(25.04.2014)

[48] Rezultadu intervista Acacio Da Cruz (Xefe do Suku)(20.04.2014)

[49] Rezultadu intervista João Lety da Assunção (funsionariu Publiku)(22.04.2014)

[50] Rezultadu intervista Leopoldo Gustavo (Juventude)(26.04.2014)

[51] Rezultadu Intervista Acacio Da Cruz(Xefe do Suku) (20.04.2014)

[52]Rezultadu Intervista Floriano Maia (Professor)(02.05.2014)

[53]Rezultadu intervista Marito Teles (Komunidade)(22.04.2014)

[54] Rezultadu intervista Ervin Jonio Carvalho Sequeira (Juventude)(02.05.2014)