OBSTAKLU SIRA KONABA RAI IHA TIMOR LESTE

INTRODUSAUN

A.    PESKIZA

Peskiza katak aktividade ida ne’ebe hala’o husi komunidade akademika no akademiku sira atu buka tuir buat ne’ebe  mak  lolos (kebenaran) iha baze hanesan iha Aldeia, Suku, Sub-Distritu, Distritu no to’o ba iha nasional konaba “rai no konflitu” ne’ebe mak mosu iha komunidade sira nia  moris. I liu husi aktividade peskiza ida ne’e mos estudante  feto ka mane bele iha konesementu  no espriensia ba siensia konaba rai ne’ebe mak iha konflitu entre rai ida ho rai seluk hanesan aldeia ho aldeia, aldeia ho suku, suku ho suku, sub-distritu ho Sub-Distritu, no Distritu Ho Distritu. Nune’e mos liu husi peskiza ida ne’e hau (estudante) atu aumenta espriensia no iha kapasidade ba mentalidade i atu kria dezenvolvimentu ba siensia iha Ensino -Superior. Mesmu ke iha buat hirak ne’ebe mensiona iha leten. Maibe, rai hanesan habitante (hela fatin) ida ba ema hotu bainhira ema ne’e rasik sei hala’o nia moris iha mundu, nune’e mos konflitu katak problema sosial ne’ebe mak mosu iha komunidade sira nia le’et no hamate fator dezenvolvimentu iha rai ida no ba komunidade ida. Iha peskiza ida ne’e mos sei fo benefisiu no fortifka estudante nia hanoin inklui matenek ba futuru oin mai atu nune’e hodi halo transformasaun ba situasaun no kondisaun ne’ebe mak sofrementu sai diak i nune’e mos aktividade ne’e sei fo vantazen diak no benefisiu ba ita nia estadu no governun inklui ba estudante ensino-superior ne’ebe mak iha kompetensia iha nasaun foun soberania ida ne’e. Iha peskiza ida ne’e mos estudante bele kapasita sira nia-an hodi sai matenek no hatene liu situasaun no kondisaun riil ne’ebe mak mosu iha ambiente povu nian iha baze, nune’e mos hodi halo relasaun metin ho komunidade sira iha area rural.. Tanba ne’e estudante sira liu husi mekanismu peskiza  ne’ebe mak tuir universidade haruka, ho ida ne’e mak peskizador sujere katak atu sai kriador ba siensia liu husi esforsu-an no konsiensia ne’ebe maka’as hodi hetan buat ne’ebe mak justu, maka ne’e deit peskizador nia hanoin no hatene konaba rai no konflitu.

2. INTERVISTA BA EMA NAIN TOLU MAK TUIR MAI NE’E :

IHA LORON DOMINGO, 25-12-2011

1. PESKIZA IHA SUKU SIBUNI, ALDEIA HOLMESEL

             I.      Identidade Pessoal

Naran              :  Afonso de Jesus da Silva

Fatin                : Holmesel

Data                :  …/ … 1963

Pozisaun          :  Chefe de Aldeia

Durasaun         :  05 – 05 - 1985 to’o 2005

Status              :  Kaben Nain

Aldeia             :  Holamasel / Holmesel

Suku                :  Sibuni

Sub-Distritu    :  Bobonaro

Distritu            :  Bobonaro

Tuir Sr. Afonso de Jesus da Silva nia argumentu hirak ne’ebe nia koalia mak tuir mai ne’e, suku Sibuni iha povasaun tolu mak hanesan :

1)      Aldeia Mapeop

2)      Sentru Sibuni

3)      Aldeia Holmesel.

Antes problema ne’e akontese ka asaltu malu entre grupu rua komesa hahu iha tempu paskoa iha loron sesta feira ho sabado, tinan 2011, durante semana rua nia laran ami sempre hein malu iha dalan atu se maka asaltu uluk, ho ida ne’e joven sira husi suku Molop, aldeia Lonlolo mai bazar iha kapital distritu Bobonaro iha loron sabadu hau nian joven sira hein sira no hetan sira hodi baku iha area Aldeia Walgomo, suku Ai-assa baliza entre suku Sibuni, fatin aktual komunidade sira hala’o aktividade negosiu fa’an sasan iha mota ibun aldeia Walgomo (Laku’uh ) tanba fatin ida ne’e komunidade sira husi suku seluk mos sempre mai hala’o aktividade fa’an produtu lokal mak hanesan suku Lour, Molop, Sibuni, Guda, Anapal, Aiassa, no sel-seluk. Entaun komesa akontese problema entre joven ho joven to’o mai iha pobasaun inklui suku Sibuni tomak hodi halo reasaun asaltu malu no insulta malu konaba rai ne’ebe mak sira halo to’os ba. Agora iha parte sul mak sai hanesan fatin konflitu ba baliza entre Aldeia Holmesel, suku Sibuni ho Lonlolo, suku Molop ho razaun tanba aldeia Lonlolo hadau ami nian rai ne’ebe mak sira halo to’os ba, tan ne’e ami ejiji sira atu husik ona ba ami la’os sira nia rai para atu hela. Maibe rai ne’ebe mak sira hela agora ne’e parte Holemesel nian, tanba uluk iha tempu vis avo sira iha ona relasaun familia nudar fen ho laen, maun ho alin, aman ho oan, kultura ida, lisan ida, no mos nudar bijinhu entaun sira hela i halo to’os ho natar to’o sira nia bei oan sira moris namkari lemo-lemo iha Timor. Iha parte sul baliza suku molop, aldeia Lonlolo sira la iha direitu ba rai no riku soin hotu, entaun iha bei ala nia tempu suku Sibuni, aldeia Holmesel baliza ita hare direitamente iha Pajoljol (mota) mak hafahe ami kuandu hare tuir mapa. Depois de sira moris ema barak tiha no invasaun militar indonezia tama mai iha Timor hela to’o nune’e ate agora. Tuir mai kronolozia iha loron paskoa tinan 2006 ataka malu entre suku rua rezulta uma to’os (Barraka) no aihan sira seluk sunu mutuk hotu, problema hotu tiha iha loron 11 de Junhu de 2006  lideransa husi parte governu mak hanesan instituisaun PNTL Sr. Basilio, komandante superientendente sub-distritu Bobonaro Sr. Atanasio ho nia elementus, Sra. Ana Pessoa iha tempu ne’eba nia kargu nudar Ministra Estatal komadante polisia Virgilho, Administrador Sr. Ernesto no chefe do suku, lia nain (tokoh adat) no komunidade hotu husi parte rua hodi asisti asaun dame ho paz ba konflitu entre suku rua hodi rezolve iha fatin akontesementu, maibe suku Molop la konkorda atu dame malu.

Iha informasaun intervista ne’e Sr. Afonso de Jesus da Silva esplika tan katak, iha loron 11 de Junhu de 2006 nai ulun sira husi governu no estadu nia tun hodi fo dame no paz tuir kultura suku rua nia liu husi juramentu ritual / sakral hanesan mekanismu ida hatudu ba ami hodi alkansa paz no estabilidade iha ami nian suku. Hala’o juramentu ne’e suku Sibuni mak responsabel ba Bibi ida hodi halo seremonia ritual iha fatin akontesementu mesmu ke ami prepara ona animal hirak ne’e, maibe bolu mos lia nain sira (Tokoh Adat)  rua ida husi suku Molop no ida seluk husi suku Sibuni hodi kaer au’u lian bunak : Le’ep (Au ki’ik) hatama ba bibi nia kidun to’o ran sai signifika parte rua se maka halo tan problema entaun nia mos kona moras ka malisan tuir henesan ne’e  atu halo lala’ok kultura suku rua nian atu nune’e la’o tuir.

Sr. Afonso de Jesus da Silva mos esplika konaba baliza iha parte hat (4) mak hanesan parte Leste baliza ho aldeia Galitas suku Lour rai ida bai-bain ema bolu Holmaumetah tanba iha momentu ne’eba mota sei la iha tuir beila sira nian tempu. Tama iha tinan 1995 mosu konflitu Holmesel leste problema ho aldeia Galitas tan rai ho lian bunak Ma’a Mali entaun asaltu malu durante loron ida tomak tuda malu rezulta ema kanek barak maske situasaun apertadu hau direitamente halai ba iha subdistritu Bobonaro hodi hato’o keisa ba administrador Sr.Fransisco Carcerres ema Manatutu maibe sira labele resolve ami nian problema no labele tun iha fatin akontesementu tanba Falintil sira barak iha area ne’e. Ho ida ne’e sente triste maka’as i loron ne’e kedas hau hato’o ba dewan perwakilan rakyat (DPR) tingkat II iha Maliana maibe la iha solusaun nafatin, depois iha loron 10 fulan Outubru tinan 1995 Sr. Thomas Ribeiro nia pozisaun nudar SEKWILDA nia foti desizaun hodi salva Holmesel atu resolve problema ne’e hare fila fali ema ailaran sira barak iha knua rua ne’e la konsege resolve entaun hau mos lakon antusiasmu ate fila mai fali iha k’nua, agora Falintil sira tama mai lidera husi komandante KAKEHE ho nia elementus hotu mai k’nua rua hodi koalia nudar ema ailaran(Gerilieru) no povu maubere tenki iha unidade ho paz atu hetan libertasaun ba rai ida ne’e ho ida ne’e problema ne’e sai la resolve i la iha solusaun diak ba ami (Holmesel). Maibe agora aldeia Galitas hela ona iha ne’eba no nia jerasaun aumenta ba bebeik to’o agora. Oeste baliza ho Suku Leber aldeia Holsa inklui suku Guda sub-distritu Lolotoi ne’e la iha problema rai, Norte baliza ho aldeia Walgomo, Odelgomo ho Longolo la iha konflitu, parte Sul mak baliza ho suku molop aldeia Lonlolo mak mosu konflitu to’o agora solusaun seidauk klaru ba ami.

2. PESKIZA IHA SUKU MOLOP-ALDEIA LONLOLO.

IHA LORON SEGUNDA, 26-12-2011

          II.      Identidade Pessoal

Naran              :  Jose de Jesus

Jintiu               :  Sil Loko

Fatin                :  Lonlolo, Molop

Data                :  10-01-1951

Pozisaun                      :  Chefe de Aldeia

Durasaun                     :  2004-2011

Stadu Sivil                  :  Kaben Nain

Aldeia             :  Lonlolo

Suku                :  Molop

Sub-Distritu    :  Bobonaro

Distritu                        :  Bobonaro

1. Iha Parte Sul Sai Komplikadu Bo’ot

Tuir jose de Jesus nia esplikasaun katak, suku Molop iha nia povasaun hirak tuir mai ne’e :

Ø  Sentru Molop

Ø  Aldeia Lonlolo

Ø  Aldeia Anapal

Ø  Molop Tas

Ø  Omelai

Ø  Bo’o

Ø  Fie-Huda

Aldeia Lonlolo parte leste baliza ho suku Lour Aldeia Galitas ho Sub-Distritu Zumalai, parte sul baliza ho  aldeia Holmesel hare tuir mota Giral Ba’a (Feri), parte norte baliza ho sentru Sibuni, parte oeste baliza ho aldeia Mapeop no suku Guda, Sub-Distritu Lolotoi inklui distritu Suai. Akontese konflitu entre suku Molop ho suku Sibuni konaba baliza iha parte sul iha loron 11 de Junhu de 2006 rezolvidu ona maibe tempu ne’eba akontese problema ne’e ami sai vitima no lakon riku soin hanesan  rezulta kuda ida mate tuda kona ho dima, uma to’os nia hetan sunu, ho aihan sira seluk, maibe la iha ema ida mak lakon nia vida.

Sr. Jose de Jesus nudar lideransa komunitaria haktuir katak baliza tun husi Molop Tas hare tuir mota to’o mai iha mota Feri, hare tuir mota no mos ho aldeia Galitas mota mak hafahe ami, nudar chefe de aldeia hakarak hato’o lolos konaba baliza aldeia Lonlolo ho Aldeia Holmesel tun husi Molop Tas to’o mai iha Feri ho Holmesel no ho Galitas iha Manuk-leun ka A’hgu’uwa tan ba ne’e hau sujere katak Holmesel halo to’os ho natar iha area Giralba’a parte Lonlolo uluk beiala sira halo  Fetsan no Umane (Kawin silang) relasaun ida ne’ebe mak metin entaun sai valor bo’ot ba ami hotu parte rua. Iha loron 11 fulan junhu tinan 2006 konflitu mosu tanba antes fulan de junhu iha ona problema kuandu hau nia joven sira ba bazar iha Sub-Distritu Bobonaro joven sira husi Holmesel baku tan ne’e mak hau nian komunidade sira hodi la satifeitu hahalok hirak ne’e to’o duni sai husi area ne’ebe mak sira halo to’os ho natar ba, i hau nudar lideransa komunitaria hau halai ba Bobonaro hato’o keisa ba instituisaun polisia (PNTL) subdistritu Bobonaro iha tempu ne’eba Sr. komandante Superientendente Atanasio no komandante polisia fronteira (BPU) Sr. Quinliano iha Maliana inklui ho nia elementus balu sae mai hodi asegura asaltu malu ne’ebe mak mosu iha hau nia suku.

Sr. Jose de Jesus esplika tan  katak wainhira atu resolve problema  hirak  ne’e iha loron 11 fulan Junhu tinan 2006 nai ulun sira husi parte governu nia mai partisipa iha suku rua nia laran mak hanesan Sra. Ana Pessoa Ministra Estatal polisia Basilio, Atanasio, Sr. Quintiliano, ho nia membru balu, administrador Sub-Distritu Bobonaro  Sr. Ernesto no Chefe do suku Molop Sr. Cerilho de Jesus Amaral uma lisan Lokal Gidal mak sefia ba ami konsentra hamutuk iha suku Sibuni bolu populasaun suku rua partisipa hala’o seremonia ritual juramentu i  kria dame ho paz hodi simu malu nudar maun alin tuir kultura Timor nian.

3. PESKIZA IHA SUKU LOUR-ALDEIA GALITAS.

IHA LORON TERSA, 27-12-2011

       III.      Identidade pessoal

Naran              :  Luis de Jesus

Fatin                :  Galitas

Data                :  01-01-1933

Lisan               :  Pugen

Pozisaun          :  Lia nain (sasin)

Estadu sivil     :  Kaben nain

Aldeia             :  Galitas

Suku                :  Lour

Sub-distritu     :  Bobonaro

Distritu            :  Bobonaro

Tuir Sr. Luis de Jesus nudar sasin ba baliza Holmesel ho Molop-Lonlolo katak rai ne’e lolos parte Molop nian tanba iha tempu kolonial Portugues sira baliza ne’e nanis hanesan ne’e hare tuir mota Feri sae to’o Molop Tas komu iha tempu ne’eba sira nian vis avo sira hola malu iha oan to’o bei oan ba bei oan i ikus mai nudar inan ida aman ida sempre iha ligasaun familia diak entre rai rua ne’e. Depois baliza iha parte sul Molop-Lonlolo ho Galitas iha Manuk-leun ka A’hgu’uwa, Galitas ho Lonlolo la iha konflitu konaba baliza, iha parte Leste Holmmesel ho Galitas mota mak hafahe i sira labele tama iha area Galitas.

Sr. Luis de Jesus esplika detailhu konaba baliza iha parte Leste aktual ami Galitas halo to’os hau blu Ma’a-Mali ne’ebe mak iha tinan 1995 akontese konflitu entre Galitas ho Holmesel, antes Portugues sira tama mai Timor hau nian avo ida naran Sina Mau husi uma lisan Pugen ho nia fen kaben Lika Bele halo to’os ho natar ikus mai mate tanba riku osan mean, batar barak, forai no ai-han seluk, entaun ema deskonesidu oho mate iha Manuk-leun ka A’hgu’uwa inklui nia oan sira. Liu tiha nune’e antes tinan 1975 tempu portugues iha momentu ne’e hau sei klosan hela avo mane ida naran Siga Mau ema Bobonaro Fie-tas ho nia fen kaben Ili-tae ema Galitas-Lour hari’i uma kain entaun sira kontinua halo to’os ho natar iha rai Ma’a-Mali i depois sira mate tiha hau nia avo naran Ili-Sina ho nia laen kaben Bele-Asa kontinua fali halo to’os, depois de sira mate hau nia feton naran Lese-Sili ho nia Laen kaben Bere-Laka no hau nia rian naran Bere-Loko husi lisan Manugatal ho nia fen Bui-Mali husi lisan Pugen, Bele-Lesu husi lisan Manugatal ho nia fen kaben Ili-Laku husi lisan Dasi-Lae kontinua tan halo to’os to’o invasaun Indonezia tama mai Timor iha tinan 1975 mak ema sira abandona hela halai ba ailaran no sira hotu lakon sira nia vida iha ailaran tanba mate ho hamlaha no mos kona tiru husi militar Indonezia i bomba husi aviaun leten tun, ho hakotu ona sira nia vida iha ailaran no ami seluk rende hamutuk ho militar sira, iha fali 1976 revolta mai Galitas hau nia subrinu naran Andre Pereira husi lisan Puggen ho nia fen kaben Santina de Jesus husi lisan Manugatal, Joao Pereira husi lisan Manugatal ho nia fen kaben Fernanda Afonso kontinua hamos hodi halo fila fali to’os, iha tinan 1984 sira nain hirak ne’e husik rai ne’e tanba asaltu husi Falintil kaer no oho sira bainhira sira ba kasa animal fuik iha baliza entre Galitas-Subdistritu Bobonaro ho Pelet-Sub-Distritu Zumalai rezulta ema mate hamutuk ema 22 ho razaun deskonfia husi Falintil sira katak sira mak sai mata dalan ka espiaun ba militar Indonezia inklui populasaun barak halai namkari hotu, i mai iha tinan 1989 situasaun normaliza fila fali aldeia Holmesel integra fali iha rai-Ma’a Mali utiliza hodi halo to’os kuda batar, aifrina, aihan sira seluk e kuda ai-horis hanesan nu’u, aiteka, ho buat sel-seluk tan moris bo’ot hotu mai iha tinan 1995 ami komesa iha ona antusiasmu atu halo to’os iha ami nian rai rasik, tan ne’e Holmesel lakohi atu integra ba Galitas hahu problema bo’ot entre povasaun rua.

Iha tinan 1995 kronolozia ne’e hetan vitima mak hanesan Dato Andre Amaral, Liurai Umberto Barreto, inklui komunidade tomak iha aldeia Galitas iha akontesementu ne’e rezulta ema kanek Sr. Calistro, Manuel Afonso kona baku ho korenti sensor nian, hau rasik kona husi fatuk direitamente monu ba rai tanba oin nakukun no seluk Americo Sequerra, Joao Perreira, Joaquim da Cruz, ho Manuel Afonso halai ba iha POLRES sub-distritu Bobonaro hodi hato’o ba Polisia Indonezia, Costantina dos Reis ho nia laen Krisjon Antonio liu husi Sr. Thomas ema Lour haruka hato’o ba Komandante KORAMIL Sr. Estanislau tu’ur iha meza tesi lia hotu aldeia Galitas mak manan i Holmesel lakon iha tinan 2005 mak hafoin aldeia Galitas halo to’os to’o agora.

3. KONKLUZAUN

Ho rezultadu aktividade peskiza konaba rai no konflitu iha suku Sibuni ho suku Molop, Sub-distritu Bobonaro, Distritu Bobonaro Sr. Afonso de Jesus da Silva husi aldeia Holmesel-Sibuni ne’e katak iha povasaun rua mak halo asaltu malu hanesan aldeia Lonlolo-Molop entre aldeia Holmesel-Sibuni iha fulan Maiu 2011 rezulta animal kuda ida mate, barraka (Uma to’os) parte rua hetan sunu no estragus ai-han seluk,  no resolve problema ne’e iha loron 11fulan Junhu tinan 2011 konaba baliza i asaun dame malu ne’e hetan partisipasaun masimu husi parte governu mak hanesan Polisia Nasional Timor Leste (PNTL), Chefe do suco, Lia nain, Chefe de juvenntude, no mos Komunidade hotu husi parte rua, mai asiste hodi hala’o atividade. Afonso de Jesus da Silva esplika katak iha tinan 1995 akontese konflitu entre aldeia Holmesel-Sibuni ho aldeia Galitas-Lour ladun konsege hetan resolve masimu husi estadu Indonezia nian tanba iha ona interveinsaun husi Falintil (ema ai-laran) ho komandante Kakehe ne’ebe mak lidera nia elementus hodi fo hanoin ba parte rua katak povu hotu tenki unidade wainhira atu liberta rai Timor ida ne’e.  Entaun ho intervensaun Falintil nian fo korazen ba povu maubere iha aldeia rua hodi kaer liman no hakoak malu tuir dalan ne’ebe mak Falintil sira hatudu. Ho ida ne’e Chefe de Aldeia Afonso de Jesus da Silva sujere katak baliza husi parte leste la rezolvidu baa mi iha momentu ne’eba. Tuir mai iha parte sul baliza ho Lonlolo-Molop hare tuir ba mota naran Pajoljol suku Molop la iha rai no la iha baliza ho aldeia Holmesel-Sibuni. Tuir Sr. Jose de Jesus husi aldeia Lonlolo-Molop ne’e katak problema ne’e rezolvidu ona tanba hetan partisipasaun masimu husi lideransa estadu, governu ho lia nain sira. Maibe, problema konaba baliza iha parte Sul ladauk iha resolve ne’ebe mak klaru tanba hare tuir ba historia tempu uluk nia Holmesel baliza ho Lonlolo hare tuir ba mota Giral Ba’a (Feri), parte norte hahu husi Molop Tas mai to’o mota Feri, iha parte leste Molop baliza ho Galitas to’o iha Manukleun, iha parte oeste baliza ho suku Guda-Sub-Distritu Lolotoi. Tuir sasin Sr. Luis de Jesus esplika katak baliza rai Holmesel ho Lonlolo ne’ebe mak lolos area Molop nia tanba iha tempu beiala sira nian kedas baliza ne’e hare tuir ba mota Feri sae ba Giral Ba’a to’o iha Molop tas. Tanba ne’e tuir hanoin ema nain tolu ne’e baliza hrak ne’e la iha ema ida mak atu klarifika lolos konaba rai hirak ne’ebe mak iha konflitu.

4. REKOMENDASAUN

Konflitu ne’ebe mak mosu iha aldeia Holmesel-Sibuni ho Lonlolo-Molop povu parte rua sujere katak sei iha komplikadu bo’ot ba sira konaba baliza aktual, inklui mos aldeia Galitas-Lour akontesementu iha tinan 1995 ho aldeia Holmesel-Sibuni. Maski resolve ona husi parte estadu ho lia nain (Tokoh adat) sira, maibe la klaru ba povu rai rua ne’e ikus mai mosu problema ne’ebe barak hodi la fo asesu ba dezenvolvimentu iha nasaun foun ida ne’e, li-liu suku Molop ho Sibuni tanba ne’e sira husu ba Estadu, Governu, no ensino superior sira ne’ebe mak hala’o peskiza ba baliza  atu tau atensaun maka’as no iha vontade diak hodi buka alternativu no mekanismu tuir lei ne’ebe mak konsagra ona iha konstituisaun RDTL nian, tanba ne’e sira husu ba ministeriu kompetente hanesan Ministeriu Justisa no Dirasaun Nasional Terras e Propriedade (DNTPSC) atu iha vontade diak hodi fo solusaun ba suku rua ne’e i no mos aldeia Galitas-Lour iha baliza ne’ebe mak injustu ba sira, li-liu povu parte rua husu ba nai ulun sira hodi buka solusaun atu nune’e sira hakarak fo kontribui diak ba dezenvolvimentu iha nasaun foun ne’e.

Rejultadu peskiza konaba rai iha Munisipiu Bobonaro

REFERENSIA :

• Sibuni,25/12/2011.Intervista.
• Molop,26/12/2011.Intervista.
• Galitas,27/12/2011.Intervista