PERFIL SUCO MALURO Created By: Estudante Faspol

PREPARA HUSI:

Partisipantes Estajiu No Servisu Social (ESS)

Fakuldade Ciensias Sosiais (FCS)

UNIVERSIDADE NACIONAL TIMOR LOROSA’E

(UNTL)

 2014

LIAN MAKLOKE

Liu husi esforsu tomak ne’ebe hala’o durante iha implementasaun programa estajiu no servisu social (ESS) iha suco Maluro, partisipantes sira konsege elabora hodi arkiva dokumentu ida ne’e durante iha fulan rua nia laran, dala uluk ami agradese ba Aman Maromak tanba ho nia grasa no apoiu masimu hodi tulun ami nia servisu ida ne’e to’o alkansa nia metafinal. Nune’e mos husi prosesu halo koleksaun dadus hodi prosesa sai nudar dokumentu ida ba suco ho populasaun iha suco maluro hanesan meus ida atu hatene konaba ezistensia kondisaun jeral rejiaun ni-nian tantu hare’e husi aspeitu rekursu naturais, rekursu umanu, infra-estrutura baziku hanesan Estrada, elektrisidade, redi telekomunikasaun, saneamentu, saude, ekonomia, agrikultura, kultura, no desportu. Iha faze independensia ne’e hanesan situasaun ida ke favoravel duni hodi kontribui ba dezenvolvimentu nasional iha nasaun foun ida ne’e. Ami apresia tanba hetan apoia no koperasaun diak iha prosesu rekolla informasaun iha terenu hamutuk ho lider komunitariu, komunidade no joventude, liu husi programa estajiu no servisu sosial ne’ebe maka hala’o iha suco Maluro/Beaco. Husi ne’e, ami ekipa estajiados reprejenta Universidade Nacional Timor Lorosa’e nia naran hodi kontribui ba sistema administrasaun suco nian. Ho hanoin ida katak dokumentus ne’ebe ami prepara ne’e seidauk perfeitu ho nune’e presija mos hanoin ne’ebe konstrutivu atu bele hadia diak liu tan iha futuru.

Mak ne’e deit ho hakra’ik-an no hako’ak bo’ot ba komunidade sira iha suco Maluro, Obrigado Wa’in.

INDISE

                                                                                Pajina

..... Perfil Suco....................................................................................................... i

..... Lian Makloke................................................................................................... ii

..... Indise............................................................................................................... iii-v

..... Kapitulu I

..... Introdusaun

..... A. Definisaun Perfil......................................................................................... 1

..... B. Introdusaun Jeral Suku Maluro................................................................... 1

..... 1. Historia Badak Suku Maluro....................................................................... 2

..... 2. Baliza Suku Maluro..................................................................................... 3

..... Kapitulu II

..... Demografia Suku

..... A. Populasaun No Uma Kain.......................................................................... 4

..... 1. Populasaun................................................................................................... 4

..... 2. Uma Kain.................................................................................................... 4-8

..... B. Iklima No Sistema Kultural Iha Suku Maluro............................................ 8

..... 1. Iklima........................................................................................................... 8

..... 2. Lian / Dalen Maternal.................................................................................. 8

..... 3. Relijiaun/ Fiar Ka Fe.................................................................................... 8

..... 4. Kultura Fiar Tradisionl................................................................................ 9

..... 5. Seremonia Ritual......................................................................................... 9

..... 6. Tradisaun Fahe Bua Ho Malus.................................................................... 9

..... 7. Kultura Hari’i Uma Lulik............................................................................ 10

..... 8. Kultura Resolve Konflitu............................................................................ 10

..... 9. Sistema Patrilineal....................................................................................... 10

10. Lalaok Koremetan Iha Suku Maluro......................................................... 10-11

Kapitulu III

Potensialidade Rejiaun Suku Maluro

A. Infra-Estrutura Baziku................................................................................ 11

1. Estrada......................................................................................................... 11

2. Eletrisidade.................................................................................................. 11

3. Telekomunikasaun....................................................................................... 12

4. Saneamentu................................................................................................. 12

B. Agrikultura.................................................................................................. 12

1. Produsaun Agrikola..................................................................................... 12

2. Peskas.......................................................................................................... 13

3. Pekuaria....................................................................................................... 13

C. Edukasaun.................................................................................................. 13

D. Desportu..................................................................................................... 13

E. Sektor Ekonomia......................................................................................... 13

1. Rendimentu Familiar................................................................................... 14

F. Sektor Saude............................................................................................... 14

G. Rekursu Naturais........................................................................................ 14

1. Turismu Natural........................................................................................... 15

Kapitulu IV

Fotografia

                                     

1. Aneksaun Dokumentasaun.......................................................................... 16-18

2. Bibliografia.................................................................................................. 19

KAPITULU I

INTRODUSAUN

A.    Definisaun Perfil

Perfil hanesan dokumentu ida ne’ebe dekrebe ba komunidade Suku Maluro, Sub-Distrito Viqueque, Distrito Viqueque nia kondisaun jeral konaba rejiaun. Nune’e relatoriu ida indika atu bele hatene ezistensia husi potensialidade sira iha suku nia laran, liafuan perfil iha lian (Bahasa Indonesia) mak bolu profil, iha lian portuges Perfil. Perfil Suku Maluro, Sub-Distrito Viqueque, Distrito Viqueque hanesan; arkivu ida sobre informasaun jeral konaba rekursu sira hanesan; Infra-Estrutura, Rekursu Naturais, Kultural, Ekonomia, Edukasaun, Saude, Agrikultura, no seluk tan. Tanba ne’e, ita presisa halo perfil suku nian ba rikeza sira eziste iha suku. Agora, tansa tenki halo ida ne’e? Presisa halo perfil suku tanba nia hanesan faze dahuluk atu halo planu ba dezemvolvimentu nian. Perfil suku hanesan halo Identifika no halo analisa ba situasaun iha baze atu  hatudu loloos situasaun moris komunidade iha suku. Liu husi perfil ka dokumentu ida ne’e bele dezeña planu ida ke diak no kona loos ba situasaun no kondisaun sira. Oinsa prosesu halo perfil? perfil suku prepara liu husi koleksaun dadus ka rekoila dadus, ka halibur dadus konta hakerek kona ba dezemvolvimento no situasaun no kondisaun iha suku.

Iha elaborasaun perfil suku liu hsui meus rua maka hanesan tuir mai:

1.      Rekolla dadus

2.      Prosesamentu dadus

Perfil suku hakerek liu husi meus kualitativu ne’ebe fo informasaun no dadus direita iha autoriedade local ho komunidade kona ba seitor sira ne’ebe importantes ba ema ne’ebé presiza, atu nune’e bele uza infórmasaun ne’ebe hetan iha perfil suku hodi bele analiza seitor saida de’it mak sei presiza dezenvolve.

B.     Introdusaun Jeral Suku Maluro

1.      Historia Badak Suku Maluro

Istoria konaba Maluro ne’e mai husi liurai ida ho naran Pedro Claver maka hari’I suku ida Maluro ne’e no Maluro signifika la integra ba rai seluk/ema ida nomos la simu rota ida husi Dom, Liurai no se-se deit, suku Maluro kompostu husi aldeia tolu mak hanesan; Maluro, Maka-Loso ho Loho-Oan, Maluro eziste iha Beila sira nia tempu to’o agora. Tempu uluk iha faze Portugues rai ida Maluro nian emar sira menus  reinu katak ki’ak ba povu/ema. No Beasu ne’e iha signifika bo’ot tanba Asu mak ba hetan be’e, asu nain ne’e nia rasa/jerasaun  sei hela deit ida ho naran Rodão Henriques agora hela iha Dili, ne’ebe kada tinan Rodão Henriques hamri’ik be’e ne’e kuandu la tama natar ne’e ona so nia mai maka kesi tiha tali tahan matak ba nia kakorok hodi dada hanesan asu ne’e maka be’e mai sei lae be’e la mai, Beasu ne’e be’e duni, asu ne’e asu duni, husi ida ne’e, ema Loho-Oan maka hetan be’e nune’e mos iha tempu ne’eba laiha mota, iha loron ida avo mane ida ba hare nia kara’u no lori ho asu aman ida, kada loron avo sempre lori ho be’e  kuandu tunu no han aifarina, fehuk nomos hemu ho be’e. iha loron ida avo haluha lori  be’e, no avo hamrok iha tempu loron manas. Asu ne’e ba labu no hetan be’e iha fatuk kuak no asu ne’e haris no fila hatudu an ba avo, avo mos hakfodak rai maran hela asu ne’e nia fulun bokon hotu ne’e? Avo lori akudesan tau iha bornal kiik hanesan kakaluk (Kohe) hodi tara iha asu nia kakorok no Tota (HAMULAK) ho liafuan  O hau nia asu O bele hatudu be’e matan ba hau, tanba hau susar be’e  hau hakarak atu hetan be’e ne’ebe ohin O hetan ne’e. Avo husik asu ne’e la’o no akudesan fakar tu-tuir  dalan no la’o tuir to’o ba fatin ne’e asu ne’e haksoit tun ba ku’ak ne’e no avo lori hali musan hitu  no ba fali uma foti hare mean musan hitu, hare mutin musan hitu,  osan mean hitu, osan mutin hitu, no lori ba be’e matan, hodi tau iha be’e matan nia leten hodi hamulak” O be’e labele maran no halo barak o nia liras atu nune’e o nia naran labele lakon, o nia naran sei temi BEASU no avo fila ba uma teki-teki rai tarutu udan bo’ot no be’e matan nakfera no fera tiha foho no sulin tun tasi tuir mota ho nune’e hanaran mota BEASU.

2.      Baliza Suku Maluro;

Ø  Parte Oeste baliza ho rai tus, Mota Builara.

Ø  Parte Norte baliza ho Wesei, Leki Luro.

Ø  Parte Leste baliza ho Oepapoek, Lohorin, Lugasa, Tuacou, Toho-Oan liga ho tasi.

Ø  Parte Sul baliza ho Tasi Timor.

KAPITULU II

DEMOGRAFIA SUKU

A.    POPULASAUN NO UMA KAIN

1.      Populasaun

              Total populasaun Suku Maluro hamutuk  Atus Sia resin ruanolu (920) habitantes, ne’ebe kompostu husi mane ema na’in Atus hat ne’en nolu resin sia (469) no feto hamutuk ema na’in Atus hat lima nolu resin ida (451), divisaun populasaun tuir aldeia hanesan aldeia Maluro maka Atus tolu hitunolu resin ne’en (376) ne’ebe populasaun barak liu, aldeia Loho-Oan iha populasaun Atus tolu ruanolu resin hat (324) barak naton, aldeia Macalosso Atus rua resin ruanolu (220) no aldeia Makaloso nia populasaun iha eskalaun ki’ik liu;

Tabela 1.

Total Populasaun

Nu.	Aldeia	Populasaun Tuir Seksu		Total
		M	F
1	Maluro	181	195	376
2	Maka-Loso	120	100	220
3	Loho-Oan	168	156	324
Total		469	451	920

2.      Uma Kain

Total uma kain iha Suku Maluro hamutuk  Atus rua lima nolu resin lima (255) no maioria lidera husi mane;

Tabela 2.

Total Xefe Familia

Nu.	Aldeia	Total
1	Maluro	95
2	Maka-Loso	62
3	Loho-Oan	98
Total		255

Tabela 3.

Total Populasaun Tuir Relijiaun

Nu.	Aldeia	Total Relijiaun
		Katolika %	Protestante %
1	Maluro	98 %	2%
2	Maka-Loso	98%	2 %
3	Loho-oan	30%	70%

Tabela 4.

Total Populasaun Tuir Profisaun

Nu.	Aldeia	F-FDTL		PNTL		Mestre/A		Seguransa Sivil		Elektrisista		Total
		M	F	M	F	M	F	M	F	F	M
1	Maluro	1	1	-	-	4	1	1	-	-	-	8
2	Maka-loso	2	2	-	-	-	2	-	-	-	-	6
3	Loho-oan	1	-	2	-	3	1	1	-	-	1	9
Total		4	3	2	1	7	4	2	-	-	1	23

Tabela 5.

Total Veteranus

Nu.	Aldeia	Total Veteranus		Kondekorasaun				Pagamentu				Total
		M	F	Simu		seidauk		Simu		Seidauk
				M	F	M	F	M	F	M	F
1	Maluro	14	2	14	2	-	-	-	-	-	-	16
2	Maka-loso	11	-	11	-	-	-	-	-	-	-	11
3	Loho-oan	10	2	11	2	1	-	11	-	1	-	12
Total		28	4	34	4	1	-	-	-	1	-	39

Tabela 6.

Total 3^o  Idade /Idosos

Nu.	Aldeia	3o Idade		Total
		M	F
1	Maluro	13	12	25
2	Macaloso	6	7	13
3	Loho-oan	29	14	43
	Total	48	33	81

Tabela 7.

Faluk

Nu.	Aldeia	Faluk tuir Seksu		Total
		M	F
1	Maluro	3	20	23
2	Macaloso	6	9	15
3	Loho-oan	4	-	4
Total		13	29	42

Tabela 8.

Oan Ki’ak

Nu.	Aldeia	Oan Ki’ak		Total
		M	F
1	Maluro	-	4	4
2	Macalosso	-	1	1
3	Loho-Oan	-	7	7
Total		-	12	12

 

Tabela 9.

Total Disabilidade

Nu.	Aldeia	Disabilidade Tuir Seksu		Total
		M	F
1	Maluro	2	3	5
2	Maka-loso	3	1	4
3	Loho-oan	2	3	5
Total		7	7	14

Tabela 10.

Populasaun Tuir Nivel Edukasaun

Nu.	Aldeia	Universidade		Graduadu		Total
		M	F	M	F
1	Maluro	1	1	6	1	9
2	Makaloso	-	-	1	-	1
3	Loho-oan	2	2	-	2	6
Total		3	3	7	3	16

Tabela 11.

Eskola EBC 03 Comandante Rosito Beaço ba tinan Akademiku 2014.

Nu.	Naran Eskola	Estudante Tuir Seksu		Total
		M	F
1	EBC. 03 Comandante Rosito Beaco	185	174	359
2	Eskola baziku filial (EBF) Rai Tahu	138	153	291
4	EBF. Fatudere	81	67	148
5	EBF. Luga-Assa	161	136	297
6	J. Infantil	27	28	55
Total		592	558	1150

 

Tabela 12.

Total Seitor Privadu

Nu.		Nivel local	Total
1	Suco Maluro	12	12
Total		12	12

B.     IKLIMA NO SISTEMA KULTURAL IHA SUKU MALURO

1. Iklima

Iklima iha suco Maluro normalmente Malirin no manas. Iha tempo udan tau durante  4 ka lima nia laran hahu husi fulan dezembru to’o Fulan Maiu, no tempo Bailoron durante fulan 4/5 nian laran Hahu husi fulan Junu to’o fulan Novembru, Georafiamente suco Maluro kondisaun rai Maioria tetuk, iha mos foho iha parte Norte. Karakteristiko rai iha suco Maluro Maioria eziste ho rai henek tasi ne’ebe komunidade sira hela hodi halo uma iha leten maka iha parte tasi nian no iha parte norte kuaze rai metan ho nia populasaun minoria deit maka hela iha fatin refere.

2.      Lian / Dalen Maternal

Lian ne’ebe  iha Suku Maluro uza hodi halo Komunikasaun mak hanesan Makasa’e, komunidade uza lian ida ne’e hodi komunika ba malu dezde bei-ala sira nia tempu to’o ohin loron no mós ho lian Nacional Tetum maibe iha tempu indonezia kuaze 1979 ital ne’e iha mos misturasaun husi aldeia rua maka integra entaun iha lian Naueti.

3.      Relijiaun/ Fiar

Relijiaun ka fiar ne’ebe populasaun iha Suku Maluro maka hanesan relijiaun Katolika ho Protestante ho nia objetivu ida katak “Fiar Na’I Maromak” husi jerasaun ba jerasaun avo ka beila sira-nia fiar halo lulik nu’udar sinal katak harohan ba lulik.

Ema ne’ebé moris iha tempu uluk ka “Paleolitik” harohan, hahi’I no halerik ba Na’I liu hosi Rai lulik, fatuk lulik mak hanesan ai-hun, foho, be’e matan,  referensia ne’e foti husi No’e iha iha meus fiar sira ne’e maka liu husi Reza no husu tulun, harohan, hahi’I ba Na’I hala’o ho lulik-Na’I liu hosi Bua no Malus, nune’e mos ba Matebian sira ne’ebe ita konsidera nudar beila ona. Tinan-tinan bainhira hare foun no batar foun tenke hamulak no harohan ba Rai-Na’in iha rai lulik atu fo nafatin rezultadu ne’ebe diak no sufisiente ba sira atu kontinua han hodi hatutan moris no hadook an husi tentasaun ruma. Bainhira atu soi rezulta dahuluk ba uma lulik no matebian sira no tunu animal sira hodi hasa’e ba to’os-na’in sira ne’ebe fila uluk ona ba Aman Maromak. Populasaun Suku Maluro Sub-Distrito Viqueque, Distrito Viqueque maioria agora dadaun fiar ba Na’I Maromak liu hosi Relijiaun Katoliku ho Protestante. Nune’e sarani katolika ho protestante iha mos fatin/uma kreda atu haklaken fiar ida-idak hanesan lokaliza sentru Maluro ho Loho-Oan.

4.      Kultura Fiar tradisionl;

Komunidade iha Suku Maluro liu husi tradisaun tota ”hamulak” bele liu husi uma kain, uma lulik, tasi lulik, no be’e lulik iha meus ida ne’e sira adora atu bele husu tulun ba beiala sira atu fo matak ho malirin iha sira nia vida moris lor-loron.

5.      Seremonia ritual

Iha fatin Estaziu ne’e ko’alia konaba seremonia ritual Fahe ba rua/tolu; sau batar liu husi uma lulik ida-idak nian, wainhira atu ke’e rai no buat seluk ne’e tenki halo iha fatin be’e matan, wainhira anin bo’ot ruma maka bebeik atu halo destroisaun sira sempre halo iha mota ka tasi hodi  tota ba beila/matebian sira maka Tunu fahi mean, inkluindu Bahem sira tenki kesi lesu iha ulun, manu mean hatun husi uma lulik ba fatin tota ne’e no temi hodi hasa’e ba sira hodi labele akontese tentasaun a’at ruma ba sira nia emar, meus ida ne’e liu husi uma lulik, be’e lulik.

6.      Tradisaun fahe bua ho malus

Normalmente hala’o kultura ka kustume fahe bua ho malus maka hanesan asaun konkreta ida atu foti be’e lulik iha fatin lulik entaun iha dadersan nakukun deit ema ida tende ba uluk kuru be’e lulik, nia servisu mak ba foti be’e liu husi odamatan feto hotu tiha nune’e fila ba uma hodi prepara bua malu, iha fatin kaku, no ikus promesa atu fo animal mean ruma no hare mos nia aten mak los ona mak sei kontinua hala’o no ladauk maka sei bua tan, sona iha hussar ho au sei diak no sei ladiak maka sei taka ho manu ida. Hotu tina nune’e fahi nia hirus matan teru (Lafatik) tau par hotu no ko’alia hotu hodi kadi ba no tuku 3 mak sei hatun objetivu atu fo matak ho malirin nafatin signifka fo forsa natural, iha tempu naruk nia laran. Bua ho malus ne’e tenki iha uma lulik sira hetan hotu.

 

7.      Kultura Hari’i Uma Lulik

Kada uma lulik iha diferensa uituan, wainhira uma lulik ne’e lahok ona no atu hari’I foun tende fo hatene ema sira iha tempu ida atu halo, agora ai lulik ba airin rua hanesan lorosae ho loromonu ne’e emar sira hulan deit ba uma, tu-tuir malu no atu harii karik tau tiha animal nian ran no direitu ba harii ne’e mane deit maka nain ba ida ne’e hotu tiha sei fase fila fali. Hala’o Seremonia/inagurasaun kultura harii uma lulik ne’e hafoin fase fila fali bolu jerasaun sira mai hamutuk mak sei halo hamutuk.  Sistema servisu ne’ebe maka sira hala’o maka servisu hamutuk entre ida-idak nian kna’ar; feto dirize hodi tein no mane maka halo uma. Sasan no animal ne’ebe fetosan sira lori wainhira halo uma lulik; manu, fahi, karau no umane la lori so hein simu deit. Iha suco Maluro total uma lisan hamutuk 33 iha aldeia Maluro 14 mak hanesan aldeia Macalosso 12 no aldeia Loho-Oan 7.

8.      Kultura Resolve Konflitu

Iha mekanismu  resolve konflitu konaba akontesementu baku malu maibe la rejulta kanek ruma, animal tama plantasaun ne’ebe hamosu deskuti malu entre komunidade no seluk tan, suspeitu/vitima hamutuk ho familia, autoriedade local kompostu husi Bahem, chefe suco, chefe aldeia, chefe joventude no Polisia Komunitaria hola inisiativa iha foti desizaun kolektiva iha uma talvez iha sede komunitariu. Wainhira iha meus kultura resolve konflitu refere la alkansa nia metafinal hanesan deskonkordansia entre suspeitu ho vitima iha foti desizaun hodi buka solusaun entaun sira nia lider sira sei transfere ba iha lei formal/estadu atu hola medida.

9.      Sistema Patrilineal

Iha suku Maluro ko’alia konaba lala’ok ida ne’e nudar direitu tomak mane maka sai na’in ba buat hotu signifika sasan hotu-hotu sura husi mane sira ka mane maka iha poder bo’ot hodi domina iha familia ka uma laran maka ita hanaran sistema Patriarkal.

     

10.  Lalaok Koremetan iha Suku Maluro

Koremetan hanesan seremonia despida ou husik lutu metan bo’ot husi familia matebian nian, iha seremonia ne’e familia bo’ot husi familia matebian nian sei halibur hamutuk iha uma matebian  hodi hanoin hikas fila fali matebian nian mate ne’ebe husik ona familia sira hodi ba moris hamutuk iha Aman Maromak nia kadunan santu. Iha suco Maluro seremonia koremetan hanesan semoria importantes ne’ebe ho rajaun atu hanoin hikas fali matebian nian mate hodi husik lutu metan bo’ot ne’ebe durante ne’e sira tutur hela, iha seremonia ne’e familia hotu sei halibur iha uma matebian nian no mos sei akompana ho seremonia ritual balun hodi oho animal, iha prosesu ida ne’e familia sira mai sei tuir nafatin lisan suco Maluro nia hanesan fetosan sira mai sei lori animal, tua no osan hodi rai hamutuk atu festeza loron matebian nian. Iha Suco Maluro seremonia koremetan sei hahu iha tinan ida hafoin mate, wainhira atu realiza seremonia koremetan antes ne’e familia husi matebian nian sei ba fo hatene familia sira hotu katak familia hirak ne’e iha kbi’it no pronto ona atu realiza seremonia koremetan, sei bainhira familia balun seidauk pronto entaun seremonia ne’e muda fali tempo seluk. wainhira atu realiza seremonia koremetan ne’e tenke hetan apoiu no konkordansia husi familia matebian nia hotu. Iha parte seluk, iha suco Maluro sistema servisu hamutuk entre komunidade sira ho familia matebian inkluindu autoriedade sira kompostu husi lia na’in/Bahen sira iha suco laran sempre tu’ur hamutuk hodi hari’I komisaun ba preparasaun servisu iha durante prosesu koremetan ne’e la’o, meus servisu hamutuk ida ne’e nudar tradisaun ida husi jerasaun ba jerasaun.

KAPITULU III

POTENSIALIDADE REJIAUN SUKU MALURO IHA SEKTOR IMPORTANTES

A.    INFRA-ESTRUTURA BAZIKU;

1.      Estrada.

      Iha suku Maluro uza nafatin Estrada protokolu ne’ebe ligasaun husi Distritu Viqueque, sub-Distritu Viqueque mai to’o suco Maluro sei nafatin utiliza Estrada nasional ne’ebe liga ba sub-distritu Uatu-lari no Uatu-Carbau, kondisaun Estrada iha suco Maluro realmente ho kondisaun ne’ebe sei diak tanba estrada ne’ebe uluk governu Indonesia sira mak halo konstrusaun.

2.      Eletrisidade

        Iha suco Maluro hahu iha  fulan Dezembru tinan 2013 uza ona  elektrisidade nasional (Olio Pezado) komunidade barak mak assesu ona ba eletrisidade tanba estadu fornese eletrisidade ba komunidade sira, winhira konta uituan ba pasadu suku refere la asesu ba eletrisidade.

3.      Telekomunikasaun

        Iha Suco Maluro/Beaço fasilidade konaba telekomunikasaun oras ne’e dadaun hetan assesu ho diak liu husi lina telefonika tanba bele assesu rede (Antena) bo’ot rua maka harii iha area Beasu ne’ebe mak emprezas bo’ot sira fornese ba komunidade sira mak husi kompanha telekomunikasaun hanesan; Timor Telecom ho Telemor Diak, maibe kompanha telkomsel seidauk hari’i antenna atu nune’e komunidade sira bele asesu.

4.      Saneamentu:

      Agua: komunidade iha suco Maluro oras ne’e dadaun barak mak seidauk assesu diak ba Be’e Mos husi dirasaun SAS ni-nian, maibe doadores internasional fornese be’e mos ba komunidade iha suku refere no utiliza nafatin be’e matan tradisional hanesan Be’e Possu hodi konsumu ba nesesidade vida moris lor-loron, iha meus utilizasaun be’e ne’e komunidade sira iha uma kain rua ou tolu uza hamutuk no maioria kada familia ida uza mesak sira nia be’e possu, no be’e mos bele uza ba tein, hemu no fase, total be’e posu ne’ebe maka rejista iha administrasaun suco hamutuk 24 no lolos atu komunidade sira konsumu be’e mos mak hanesan be’e matan lima (5) inkluindu be’e possu ne’ebe la tama lista suku nian.

        Fatin Lixu: Iha suco Maluro oras ne’e dadaun organizadu Fatin Lixu la iha problema tanba inisitiva komunidade sira nian hodi dezenvolve fatin tau fo’er iha kada uma kain ida-idak nian hodi ke’e rai ko’ak ba fakar fo’er, komunidade no estudante iha suco refere mós utiliza nafatin fatin lixu tradisional hodi halo’ot fo’er.

        Sanitariu: Komunidade iha suco Maluro maioria mak sei nafatin utiliza sanitariu tradisional maibe minoria mak uza sintina moderna ba nesesidade loron-loron nian iha kada familia uma kain.

B.     AGRIKULTURA

1.      Produsaun Agrikola

        Iha Suco Maluro hanesan suco ida ne’e be iha potensia ba agrikultor hodi produs produsaun sira nebe’e konsumu ba nesesidade no mos bele halo negosiu iha Merkadu hodi sustenta ba nesesidade lor-loron nian. Alende ne’e mos bele hasa’e rendimentu ekonomia familiar. Produsaun agrikola iha suco Maluro mak hanesan tuir mai ne’e: Nu’u, aifarina, kontas, talas, kinur, ailia, du’ut morin no tangerinhas.

2.      Peskas

        Suku Maluro nudar sentru  ba peskas ne’ebe potensial teb-tebes ba hasa’e rendimentu familiar tanba lor-loron komunidade sira sempre tau atensaun ba area tasi maka hanesan sira nia fatin hodi buka osan. Ho nune’e iha suco refere komunidade sira utiliza material hanesan Bero makina no bero manual ne’ebe kuaze hamutuk 25

3.      Pekuaria

        Animal sira ne’ebe maioria komunidade haki’ak iha suco Maluro maka hanesan Tuir Mai ne’e: Kara’u Timor, Karau Vaka, Kuda, Fahi, bibi, Asu, no Manu.

C.     EDUKASAUN

        Sector edukasaun iha suku Maluro hetan mudansa bo’ot kompara ho tempo kolonial portugues no tempo Indonezia tanba komunidade no joven barak mak komesa hetan ona assesu ba edukasaun maske oras ne’e dadaun foin mak iha edifisio eskola rua hanesan Eskola infantil ho ensino baziku ne’ebe lokaliza iha suco Maluro nian laran. Kondisaun no edifisiu eskola ne’e rasik sufisiente maibe fasilidade eskola ne’e seidauk sufisiente inklui mos rekursu umanu/ema atu hanourin estudante sira sei menus, professor balun ne’ebe ho kapasidade minimu atu garante kualidade edukasaun iha Beaco.

D.    DESPORTU

            Iha suco Maluro fatin importante ida maka hanesan kampo futebol ho volibol ne’ebe joventude sira sempre utilize ba atividade jogu entre joventude local ka ho joventude husi suco sira seluk ne’ebe iha talentu hodi hasa’e sira nia espiritu desportiva hodi kontribui ba dezenvolvimentu nasional iha Timor Leste. Tanba ne’e, kampo ne’ebe maka eziste iha suco Maluro ho kondisaun ne’ebe garante ba joventude sira hodi hala’o sira nia atividade desportu. Husi ida ne’e, kampo ne’ebe iha ho dimensaun bo’ot no luan ho nia estandarte nivel nasional.

E.     SEKTOR EKONOMIA

     a). Rendimentu Familiar

        Rendimentu familiar iha suco Maluro dependente ba tasi no plantasaun ne’ebe mak sira iha inklui mos animal balun ne’ebe sira hakiak hodi lori ba fa’an iha sentru Merkadu sub-distritu Viqueque hodi sustenta ba nesesidade uma laran, aleinde iha komunidade balun ne’ebe mak halo negosio ki’ik hanesan loke kios no fa’an produtus alimentar balun iha suco laran maka hanesan tua mutin, tua metan, tua sabu no ikan ne’ebe mak komunidade sira hetan transfere ba ema ne’ebe maka iha transprote ba fa’an iha capital munisipiu. Tuir informasaun husi fontes lubuk ne’ebe maka deskobre husi komunidade hateten katak rendementu familiar ne’ebe iha atinze hahu U$ 5-25.00 Dolares Amerikanu kada loron ida.

F.     SEKTOR SAUDE

        Suco Maluro iha klinika ida hari’i iha tinan 2003, Comunidade ba konsulta moras iha klinika kuandu moras grave  maka halo referral ba hospital Viqueque. Rekursu umanus iha klinika Doutor 1 no Parteira 1 maternidade  komunidade ba fo hatene iha parteira hodi fo  partus iha  uma deit. Kuandu grave maka lori ba hospital Viqueuqe. Programa saude  komunitariu hanesan SISKA halao iha suco fulan ida dala 1durante ne’e halo tratamentu ba komunidade nian moras liu-liu ba inan feton sira ne’ebe isin rua no oan nurak no aimoruk diak iha suco Maluro oras ne’e dadaun sentru saude sentraliza iha Maluro hanesan uma (Ex. Perumahan) ne’ebe mak estadu Indonesia sira husik hela, hahu iha 2003 utiliza nudar postu saude no fatin ida hodi jere administrasaun saude iha suco Maluro ne’ebe maka komunidade sira suco rua uza hamutuk hodi halo tratamentu ba saude.

G.    REKURSU NATURAIS

      Rikeza Natural nebe’e eziste iha suco Maluro mak hanesan Rai Henek Tasi, Rai Henek Mutin, Fatuk/Batu Karang nebe’e iha potensia no kualidade diak tebes kompara Rai henek mota wainhira utiliza hodi dezenvolve uma no mos produs Batako. Alende, husi rikeza sira ne’e iha mos rekursu naturais hanesan Gas no mina rai ne’ebe tama ona iha isu nasional tuir planu Governu ho Estadu atu halo operasional ba LNG ni-nian.

Iha planu Governu katak disidi Beaco sai sentru ba projeitu LNG iha Timor Leste maibe ita konsidera rekursu naturais LNG ne’e nuda rikeza ida ba suku Maluro tanba lokaliza hela iha Beaco.

H.    Turismu Natural

Suco Maluro hanesan area importante ida ba nasaun Timor Leste iha seitor turismu tanba realidade persepsaun hare liu parte tasi ita konsidera nudar fatin turistiku hodi atrai turista local no internasional sira bele vizita fatin ne’e hanesan iha aldeia Loho-Oan, aldeia Maluro razaun ida katak natureza ne’ebe mak furak no ambiente tasi ne’ebe mak mos. 

KAPITULU IV

FOTOGRAFIA

1.      Aneksu dokumentu

Iha aneksu dokumentasaun ne’ebe temi nudar fontes ba dadus durante kolekta informasaun iha terenu;

Figura 2: Estudante ESS rekolla dadus Edukasaun husi Direitor Escola EBC.03 Comandante Rosito Beaco .

Figura 1: Estudante ESS rekolla dadus husi komunidade iha aldeia Maluro

                                                                                             

	Figura 3: Estudante ESS rekolla dadus husi xefe aldeia, lia na’in ho komunidade iha aldeia Macalosso.					Figura 4.  Estudante ESS rekolla dadus husi xefe aldeia, lia na’in ho komunidade iha aldeia Loho-Oan.

 

                             

LIAFUAN  AGRADESIMENTU

Kordenador Estajiu Servisu Sosial (ESS) FCS-UNTL 2014.

      Dala uluk hau representa partisipantes estajiariu sira hotu ne’ebe hala’o estajiu no servisu social (ESS) iha suku Maluro, hodi hato’o agradesementu ba estrutura suco Maluro, Komunidade ho joventude tomak iha suku Maluro tanba durante ne’e kopera diak ho estajiariu hodi halo aktividade hotu-hotu ne’ebe estajiariu hala’o durante fulan rua nia laran, komesa iha loron Quinta Feira dia 16 Outobru to’o 16 Dezembru 2014 aktividade hotu-hotu hala’o husi estajiario la’o ho diak, hanesan programa ne’ebe estajiariu nia dahuluk iha loron Sesta Feira 17 Outobru 2014 estajiariu halo abertura Estajiu no Servisu Sosial iha sede suku Maluro, hafoin estajiariu halo planu hodi halo aprosimasaun ho estrutura suku, programa ne’ebe konkorda hamutuk mak hanesan halibur dadus hodi hakerek dokumentu ida ne’e, halo servisu komunitariu nudar parte integradu ida hodi garante ba programa estajiu, halo plaka atu hatudu identidade Suku, estrutura suco. Durante hala’o programa hirak ne’e estajiariu hetan apoiu moral no seguransa masimu husi estrutura suku, komunidade no joventude iha suku Maluro, liu-liu Chefe suku Sr. Jeronimo Pinto, Chefe aldeia tolu hanesan; aldeia Maluro Sr. Celestino Miguel, aldeia Macalosso Vicente Fernandes, aldeia Loho-Oan Sr. Ventura Soares, Chefe Joventude Sr. Bendito Soares no Komunidade iha aldeia tolu (3). Husi ida ne’e nu’udar estudantes buat ne’ebe ami halo iha suku Maluro seidauk representa los tuir espektasaun, maibe hakarak dehan de’it katak foin mak inisia no iha esperansa bo’ot future ema seluk sei halo diak liutan. Monografia ka perfil hanesan dokumentu ida ne’ebe hatudu suku nia situasaun jeral. Partisipantes estajiu no Servisu Sosial  la haluha hato’o obrigado wain.

Entrega Perfil Suku Maluro

      Perfil suku Maluro entrega imediatamente husi koordenador estajiu servisu social (ESS) ho membru tomak kompostu husi departementu rua mak hanesan Departementu Dezenvolvimentu Komunitariu no departementu politikas publikas hamutuk ema na’in Sia kompostu husi mane nain Hitu (7) no feto nain Rua (2) ne’ebe estajiu iha suku Maluro durante fulan rua nia laran hahu iha loron Quinta Feira, 16 Outobru to’o 16 Dezembru 2014.

Visto pelo,

Maluro, 15 Dezembru 2014

         

          Dosente Orientador Kampo                      Koordenador ESS Maluro

        (Natalino de Jesus Gusmão, MA)                     (Silvestre M. Soares)

         

Xefe Suku Maluro

         (Jeronimo Pinto)

2.                                     Bibliografia;

Fontes; chefe de aldeia,Vicente Fernandez, Macalosso 21/22-11-2014.

Fontes ; chefe aldeia, Celestino Miguel Maluro 24/11/2014

Fontes; chefe aldeia, loho-oan, ventura Soares, 25/11/2014.

Fontes: Domingos Henrique, (maulata), Loho-Oan 15/05/1962.

Jeremias Soares, Uma kain Defa palo, lia na’in, 24/3/1963,

(Fontes: Mariano Pinto ho Domingos Henrique).

Fontes : Consellu suco Maluro, Leão Claver